Santiago de Compostela, 30 de decembro de 2025

O Goberno galego publica, no Portal de Contratos Públicos, por medio da Consellería de Sanidade e por un importe de 372.741 euros, a licitación da redacción do proxecto básico e de execución e dirección de obra do novo centro de saúde de Mos. Esta infraestrutura sanitaria integrarase no complexo sociosanitario do Rebullón e incorporará unha área pediátrica específica.

As empresas interesadas nestas contratación teñen de prazo ata o 2 de febreiro para presentar as súas ofertas.

O prazo de execución da redacción do proxecto básico é de mes e medio desde a formalización do contrato. Logo de aprobarse o proxecto básico, disporase de dous meses para a redacción do proxecto básico e de execución.

Unha vez que se dispoña do proxecto aprobado, o Executivo galego procederá a licitar as obras nas que a Xunta prevé investir 4,7 millóns de euros, co obxectivo de que se poidan iniciar no primeiro trimestre de 2027.

O novo centro de saúde que construirá a Xunta no concello de Mos disporá de dúas plantas cunha superficie útil total de 2.740 m2, o que supón un incremento do 65 % en comparación co actual.

Plan funcional

O novo centro de saúde permitirá habilitar espazos propios para o servizo de pediatría, con dúas consultas de medicina, dúas de enfermería pediátrica e, como novidade, unha sala de lactancia e outra polivalente para posibles necesidades de uso exclusivo por pacientes respiratorios.

Na área médica, contarase con 11 consultas de medicina de familia (dúas máis que o actual), 11 de enfermería (dúas máis), unha de matronas, unha de farmacia, un novo despacho de traballo social, dúas salas polivalentes (unha máis, na que se realizarán ecografías, retinografías, electrocardiogramas ou espirometrías) e seis consultas de formación a residentes (dúas máis, co que se poderá aumentar a actividade docente con tres residentes MIR de medicina e tres EIR de enfermería).

No novo centro de saúde tamén se prevé unha nova sala de cirurxía menor, unha nova consulta de nutricionista, ademais dun ximnasio de fisioterapia ao incorporarse un profesional desta categoría.

Tamén se amplía a carteira de servizos na área da muller, xa que o plan do Servizo Galego de Saúde dispón dunha sala de educación sanitaria que servirá para realizar programas de rehabilitación de solo pelviano.

Na área de urxencias, que contará cunha sala de observación e unha de reanimación, habilitarase tamén unha nova sala de traballo de enfermería e dous vestiarios.