Oroso (A Coruña), 14 de xaneiro de 2026

A conselleira de Política Social e Igualdade, Fabiola García, acompañada do alcalde de Oroso, Álex Doval, visitou esta mañá a escola infantil municipal de Oroso para anunciar un investimento da Xunta de 150.000 euros que permitirá mellorar os servizos e a atención que ofrece este centro. Na visita tamén participou o xerente do Consorcio Galego de Servizos de Igualdade e Benestar, Perfecto Rodríguez.

Os traballos afectarán tanto ao interior como ao exterior da escola e consistirán na reforma da instalación eléctrica, co fin de aumentar a eficiencia enerxética e mellorar a iluminación, e na renovación dos elementos de carpintería, como as portas e as ventas. Tamén se intervirá nas aulas, que se pintarán e nas que se cambiará o mobiliario e equipamento.

Así mesmo, con esta achega da Xunta dotarase ao centro dun novo parque infantil nas inmediacións, cunha área de xogos renovada e cun terreo adaptado e con zonas verdes.

Fabiola García sinalou que esta actuación é unha mostra máis do compromiso do Executivo autonómico co atención á infancia e o apoio á conciliación das familias. Así, destacou os investimentos de mellora nos centros de 0 a 3 anos e medidas pioneiras como a gratuidade desta etapa educativa.

Neste sentido, puxo en valor que este é o cuarto curso consecutivo no que as familias galegas non teñen que pagar nada pola atención educativa das súas crianzas, vaian a unha escola infantil da Xunta, dependente dun concello, de iniciativa social ou privada. De feito, grazas ao programa da gratuidade, Galicia lidera a taxa de escolarización no primeiro ciclo de educación infantil con case un 65%, situándose 15 puntos por riba da media nacional.

Novos investimentos nas escolas 0-3 da Xunta e municipais

As melloras que se levarán a cabo neste centro de Oroso forman parte dun novo programa de intervencións en escolas infantís públicas de 0 a 3 anos toda Galicia, de titularidade municipal e autonómica, ao que a Xunta destinará preto de 1 M€.

Con estes fondos, acometeranse actuacións de reforma, de ampliación, de renovación de cubertas e fachadas ou de equipamento en escolas 0-3 de 14 concellos  de toda Galicia. Serán os municipios os encargados de contratar e executar os traballos, que deberán estar rematados en decembro deste ano.