Santiago de Compostela, 15 de xaneiro de 2026

A conselleira de Economía e Industria, María Jesús Lorenzana, avogou hoxe por que Administración, empresas e cidadanía traballen en equipo para xerar consensos fronte ao negacionismo industrial e a postura do non a todo. “Se todos seguimos remando dentro dese equipo imos poder construír unha Galicia máis moderna, con emprego de calidade e servizos sociais que se poidan seguir mantendo ao nivel en que se mantiveron os últimos anos”, manifestou.

Lorenzana, xunto ao conselleiro de Emprego, Comercio e Emigración, José González, participou hoxe na inauguración do I Comité Federal de FeSMC-UGT, en Santiago, onde sinalou a importancia de que os galegos entendan o que está facendo a Xunta de Galicia en materia enerxética e industrial para “non perder ese tren”.

“Preocúpanos a situación enerxética que vive España”, abondou, para remarcar que “á industria e á enerxía hai que tratalas como un todo porque as empresas hoxe en día non poden vivir sen enerxía barata” e sen acceso a unha rede de transporte eléctrico adecuada.

A conselleira concluíu recoñecendo que “grazas ao diálogo social, Galicia está sendo quen de traballar con claridade nas necesidades que teñen as empresas e a industria para crear máis e mellor emprego, que estea mellor formado”. Neste contexto, indicou que o Goberno galego vai seguir traballando polo desenvolvemento económico de Galicia, por atraer novos proxectos, e polo mantemento de todas as empresas que están agora mesmo funcionando, para que poidan seguir crecendo e expandíndose.

Institucionalizar o Diálogo Social

Pola súa banda, o conselleiro de Emprego, Comercio e Emigración, José González, destacou o papel fundamental que desenvolven organizacións como UGT na defensa dos dereitos das persoas traballadoras, actuando con responsabilidade e cunha firme vontade de diálogo e acordo. Nese sentido, subliñou que Galicia continúa avanzando na tramitación do decreto que permitirá institucionalizar o Diálogo Social como unha ferramenta esencial para acadar consensos entre todos os axentes sociais, non só no ámbito das relacións laborais —remarcou— senón tamén no conxunto da actividade económica.

O conselleiro explicou que este decreto permitirá reforzar o papel das mesas que xa integran o Diálogo Social, como a Mesa de Emprego —cos seus grupos de traballo en políticas activas de emprego e flexibilidade da formación, prevención de riscos laborais e absentismo laboral, e igualdade laboral— e a Mesa de Economía e Industria, que inclúe grupos de traballo nos ámbitos de industria e enerxía, naval e automoción.

Así mesmo, avanzou que ao longo deste ano se porá en marcha a Estratexia Galega de Responsabilidade Social Empresarial, que será deseñada cun enfoque centrado no benestar laboral, un elemento clave tanto para as empresas como para as persoas traballadoras.