Lugo, 1 de febreiro de 2026

A Consellería de Presidencia, Xustiza e Deportes achegou 15.000 euros á asociación de veciños de San Xoán de Tirimol (Lugo) para facer reformas no seu local social e adquirir equipamento.

O delegado territorial da Xunta, Javier Arias, visitou hoxe as instalacións para coñecer as  obras realizadas, financiadas con cargo á orde anual de axudas destinadas ás organizacións veciñais galegas.

A intervención incluíu a colocación de falso teito; renovación do chan; reparación e pintado dos paramentos interiores; traballos para mellorar a accesibilidade no aseo e ampliación da cociña. Tamén se actuou nas instalacións de electricidade e fontanería.

Ademais, a entidade adquiriu mobiliario – mesas e cadeiras- e outro equipamento necesario para desenvolver as actividades lúdicas e culturais que organiza durante todo o ano.

Arias destacou o importante papel que xogan as asociacións de veciños “fomentando a participación cidadá e a cohesión social nos barrios e parroquias da provincia, con especial incidencia nas zonas rurais”, apuntou.

A Xunta colabora con estas agrupacións a través desta liña axudas que se publican anualmente. Na convocatoria de 2025 resultaron beneficiarias 14 asociacións do municipio de Lugo, que sumaron apoios por valor de 152.200 euros.