O conselleiro de Sanidade, acompañado do xerente da área sanitaria de Vigo, interveu na inauguración do VIII Simposio Nacional de Oncoloxía de Precisión
Gómez Caamaño destaca o investimento da Xunta de preto de 23 M€ en terapias CAR-T que permitiron achegar tratamentos avanzados a 170 pacientes de cancro
O Centro de Protonterapia de Galicia introducirá por primeira vez a terapia de protóns na sanidade pública, tratando pacientes a finais deste ano ou principios do próximo
O Centro de Fabricación de Terapias Avanzadas acadará este ano un novo fito coa produción de fármacos propios
O Servizo Galego de Saúde tamén está a traballar en rede cos hospitais das sete áreas sanitarias para conformar un Centro integral de coidados do cancro no marco da rede impulsada pola Unión Europea
O conselleiro considera clave a creación do Comité Molecular de Tumores e o desenvolvemento de grandes iniciativas como o Proxecto Xenoma Galicia
Vigo, 19 de febreiro de 2026
Galicia conta con tres hospitais integrados na rede punteira de terapias CAR-T, os de Santiago de Compostela, A Coruña e Vigo, e xa investiu preto de 23 millóns de euros nestas terapias innovadoras, posibilitando tratar a 170 pacientes.
O conselleiro de Sanidade, Antonio Gómez Caamaño, acompañado do xerente da área sanitaria de Vigo, Javier Puente, interveu no acto de inauguración oficial do VIII Simposio Nacional de Oncoloxía de Precisión.
O titular da carteira sanitaria da Xunta salientou a próxima posta en marcha do novo Centro de Protonterapia de Galicia, que introducirá por primeira vez a terapia de protóns na sanidade pública. Grazas a esta infraestrutura, a comunidade será pioneira no Sistema Nacional de Saúde ao tratar aos primeiros pacientes a finais deste ano ou principios do próximo.
Galicia ten tamén en marcha cinco proxectos desenvolvidos en colaboración con outras comunidades, destinados ao deseño de novas terapias en tumores gástricos e pancreáticos, a través do Centro de Fabricación de Terapias Avanzadas que, neste ano, marcará un novo fito coa produción de fármacos propios.
Ademais o Servizo Galego de Saúde está a traballar en rede cos hospitais das sete áreas sanitarias para conformar un Centro integral de coidados do cancro, integrado na rede impulsada pola Unión Europea.
Galicia na vangarda da medicina personalizada
Na súa intervención, o conselleiro agradeceu á Fundación Galega de Investigación Biomédica Galicia Sur todo o seu traballo e esforzo na organización do simposio destinado a compartir coñecementos e ideas para construír unha nova forma de abordaxe do cancro.
O máximo responsable do Servizo Galego de Saúde puxo en valor Estratexia de oncoloxía de precisión de Galicia, grazas á que comunidade está na vangarda da medicina personalizada.
Neste sentido foi clave a creación do Comité Molecular de Tumores e o desenvolvemento de grandes iniciativas como o Proxecto Xenoma Galicia, medida pioneira na que se creará un mapa xenómico poboacional co propósito de impulsar novos programas de prevención.
Imaxes relacionadas
