Lugo, 23 de marzo de 2026

O delegado territorial da Xunta, Javier Arias, reuniuse esta mañá na Delegación Territorial co novo xefe de Brigada da Policía Xudicial en Lugo, Francisco Vázquez, que dende o ano 2020 ocupaba a xefatura do Grupo Operativo da Unidade de Policía Adscrita (UPA) de Galicia na provincia. Na xuntanza tamén estivo o máximo responsable da UPA en Lugo, Moisés Muñiz.

Arias desexoulle a Vázquez sorte nas súas novas responsabilidades no corpo de Policía Nacional. Reiterou o compromiso da Xunta de seguir fortalecendo a colaboración e a coordinación entre os distintos corpos de seguridade, que desenvolven unha función esencial na protección da cidadanía.