Lugo, 24 de marzo de 2026

O delegado territorial da Xunta, Javier Arias, urxiu hoxe ao Concello de Lugo a asinar “sen máis escusas nin demoras” o convenio necesario para poder avanzar na renovación integral da rúa Serra de Meira. Subliñou que a sinatura deste documento é un “trámite imprescindible” para que a Administración autonómica poida dispor dos terreos necesarios e iniciar os traballos neste viario de titularidade municipal, que financiará integramente cun orzamento de 1,1 millóns de euros.

Arias lembrou que o convenio foi remitido ao Concello o pasado 21 de xaneiro, “e máis de dous meses despois seguimos agardando”. Indicou así mesmo que, “atendendo ás peticións do goberno local e co obxectivo de axilizar o procedemento”, a Consellería de Vivenda e Planificación de Infraestruturas remitiu tamén posteriormente ao goberno local o proxecto técnico, “aínda que eran perfectamente coñecedores do mesmo, xa que foi consensuado en reunións previas entre representantes das dúas Administracións”.

Para o delegado, “os feitos demostran que non hai vontade real de axilizar esta actuación por parte do Concello”, ao que responsabiliza de “bloquear, unha vez máis, unha intervención prioritaria para a cidade e moi demandada polos veciños e veciñas”. Fronte a isto, subliñou que a Xunta “está a actuar con responsabilidade, cumprindo coas súas obrigas e mesmo asumindo o financiamento íntegro desta actuación, nunha vía municipal, que pasou dunha previsión de investimento inicial de 400.000 euros a superar o millón de euros”.

Advertiu que a demora na tramitación do procedemento “pon en risco os prazos previstos para licitar as obras no primeiro semestre deste ano” e apelou á responsabilidade do goberno local “para non seguir freando unha actuación clave que permitirá contar cunha rúa completamente renovada, máis segura e accesible”.

Arias lembrou que a actuación prevista pola Xunta na rúa Serra de Meira “vai moito máis alá dunha reurbanización ao uso” xa que, ademais de mellorar e ampliar a calzada e as beirarrúas, farase unha completa renovación dos servizos urbanos (saneamento, abastecemento de auga, electricidade, telefonía) e instalarase novo alumeado, mobiliario urbano e dúas marquesiñas de autobús. A maiores, para coidar a integración paisaxística co parque do Sagrado Corazón e a contorna próxima, plantarase novo arborado e acondicionaranse os itinerarios peonís

“O que buscamos é unha intervención acorde co peso que vai ter esta zona na nova configuración da cidade, xunto á nova estación Intermodal e ao ámbito do Sagrado Corazón onde se centra o proxecto da Xunta para a promoción de vivendas”, concluíu.