Cambados (Pontevedra), 26 de marzo de 2026

A directora xeral de Ordenación e Innovación Educativa, Judith Fernández, asistiu hoxe á proxección dunha curtametraxe sobre igualdade de xénero no Colexio de Corvillón en Cambados. A actividade enmárcase no programa Cinema con perspectiva, no que este curso participan 12 centros da provincia de Pontevedra, que a Xunta desenvolve en colaboración coa asociación cultural Festival Internacional Cinema de Bueu (FICBUEU) e que se dirixe a alumnado de 5º e 6º de Primaria e de 1º e 2º de Educación Secundaria Obrigatoria.

Un total de 30 centros de toda Galicia participan este curso neste programa, que se leva a cabo a través de dúas actividades. Por unha banda, a proxección dunha curtametraxe para fomentar entre o alumnado a reflexión sobre o papel da muller na sociedade, a violencia de xénero e as desigualdades. Unha vez concluído o visionado ten lugar un coloquio moderado por un especialista, co fin de estimular a capacidade reflexiva e analítica do alumnado sobre os valores e as mensaxes ocultas en materia de igualdade presentes nas filmacións.

A segunda actividade consiste nun obradoiro educativo para a creación dunha produción audiovisual (curtametraxe, anuncio publicitario, vídeo musical, entrevista...) sobre igualdade de xénero, o que permite aos estudantes adquirir formación básica sobre linguaxe audiovisual entre outras competencias.

A relación de centros participantes no programa da provincia é a seguinte:

Cinema con perspectiva enmárcase na Estratexia galega de convivencia escolar, que promove a educación no respecto e na promoción dos dereitos e das liberdades fundamentais, na consecución efectiva da igualdade de dereitos e oportunidades entre mulleres e homes e na igualdade de trato e non discriminación ás persoas en función da súa condición sexual. Ao mesmo tempo, búscase previr a violencia de xénero.