Chantada (Lugo), 28 de abril de 2026

Chantada acolleu hoxe unha das xornadas divulgativas sobre a eclipse que está a impulsar a  Xunta, a través da Axencia de Turismo de Galicia, nos destinos Starlight, co fin de prepararse para este acontecemento que se producirá o 12 de agosto en coordinación co sector turístico local.

O delegado territorial de Lugo, Javier Arias, interviu na actividade, que contou tamén co presidente do Clúster de Turismo de Galicia, Cesáreo Pardal; o presidente da Confederación Galega de Empresarios de Hostalería e Turismo, Cheché Real; e o alcalde chantadés, Manuel Lorenzo, entre outras persoas.

Arias apuntou que Lugo será un dos mellores lugares para avistar este fenómeno excepcional, xa que é a provincia galega con maior presenza da franxa de totalidade, que atravesará a meirande parte do territorio.

Afirmou que a Xunta está a traballar para aproveitar todas as oportunidades que brinda esa posición privilexiada dende o punto de vista turístico. Nese sentido, en colaboración cos destinos Starlight estanse a impulsar unha serie de xornadas promocionais que terán continuidade o 10 de maio na comarca dos Ancares – a sede será a Casa do Concello de Navia de Suarna -.

Neste tipo de encontros achégase información práctica sobre a eclipse, cales son os mellores lugares avistala, as indicacións para facelo de forma segura e mesmo como captar instantáneas, coa realización dun simulacro e prácticas de fotografía.

A Xunta activa unha páxina web específica

O Goberno galego activou unha web específica sobre a eclipse, con información de servizo orientada a unha observación segura e sen contratempos. A plataforma inclúe un mapa interactivo que permite consultar, concello a concello, detalles como a hora de inicio, duración, características —se é total ou parcial—, predición meteorolóxica.... Os contidos irán actualizándose a medida que se achegue o 12 de agosto.

Visible dende catro países

Este fenómeno non se produce na Península desde 1912, hai máis de 110 anos, e non volverá repetirse con carácter total ata o ano 2180. A fase de totalidade —momento no que a lúa oculta completamente o sol— só será visible desde catro países, entre eles España.

A franxa de totalidade atravesará o territorio galego desde Estaca de Bares, en Mañón, ata a comarca de Valdeorras, limítrofe con Castela e León, percorrendo áreas das catro provincias. En total, 143 concellos galegos —o 45,6% do total— situaranse na zona de observación privilexiada, abarcando a práctica totalidade da provincia de Lugo,  o norte da provincia da Coruña, o nordeste da provincia de Ourense e áreas do interior de Pontevedra. No resto do territorio poderá observarse de maneira parcial.

Segundo as previsións, a hora de inicio será arredor das 19:31 horas e prolongarase ata as 21:23 horas, acadando o seu momento de máxima escuridade entre as 20:28 e as 20:30 horas, en función da localización.