O Porriño (Pontevedra), 19 de maio de 2026

A Xunta de Galicia gaba a importancia de eventos como o Foro de emprego e desenvolvemento O Porriño Conecta Talento como un escaparate para coñecer de primeira man as oportunidades formativas e profesionais a través de actividades informativas e medio cento de stands nos que están representados centros educativos, universidades, empresas, entidades públicas e administracións.

O conselleiro de Educación, Ciencia, Universidades e FP, Román Rodríguez, visitou esta mañá o evento, onde aproveitou para poñer en valor iniciativas coma esta que buscan  impulsar a relación entre formación, emprego e tecido empresarial. “Un espazo no que persoas en busca de oportunidades poidan coñecer de primeira man as demandas actuais do mercado laboral e os itinerarios formativos dispoñibles”, abondou.

Pola súa banda, o conselleiro de Emprego, Comercio e Emigración, José González, intervirá pola tarde na clausura do evento, onde poñerá en valor a aposta da Xunta por conectar o talento coas necesidades do tecido produtivo e coas oportunidades laborais e de emprendemento de cada territorio. Neste contexto, salientará as medidas impulsadas polo Goberno galego para fortalecer o talento interno, flexibilizar a formación e favorecer a chegada de profesionais do exterior, con especial atención ao retorno dos galegos e galegas do exterior. Ademais, poñerá o foco no labor do Polo de emprendemento do Porriño, integrado na rede galega de 15 oficinas distribuídas por toda Galicia, e que xa leva atendidos máis de 1.000 proxectos emprendedores só nesta sede. O titular de Emprego tamén subliñará a colaboración do Concello do Porriño no desenvolvemento das políticas activas da Xunta, a través da participación en iniciativas como os Programas Integrados de Emprego ou os obradoiros duais, que contribúen a mellorar a empregabilidade e dar resposta ás demandas do tecido empresarial local.

O Conecta Talento, impulsado polo Concello do Porriño, está pensado para estudantes, persoas desempregadas, profesionais en transición e calquera persoa interesada en orientar ou reorientar a súa traxectoria profesional. O evento combina actividades informativas que inclúen relatorios sobre oportunidades formativas, sesións de orientación profesional, dinámicas centradas nas melloras das habilidades persoais e espazos de interacción directa coas empresas.