Santiago de Compostela, 15 de xuño de 2026

A Consellería do Medio Rural informa de que se vén de desactivar a Situación 2 no incendio forestal do concello coruñés de Padrón, parroquia de Herbón, que se deu por estabilizado ás 10.56 horas de hoxe. Esta situación operativa de emerxencia foi declarada o sábado, día 13, pola proximidade do lume aos núcleos de Cruxeiras de Abaixo e Sobrerribas.

O incendio iniciouse ás 16.01 horas do venres, día 12, e segundo as últimas estimacións afecta unha superficie de 350 hectáreas. Para a súa extinción mobilizáronse polo de agora, de xeito acumulado, 7 técnicos, 70 axentes, 102 brigadas, 73 motobombas, 5 pas, 9 unidades técnicas de apoio, 8 helicópteros e 7 avións.

A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais que acadan as 20 hectáreas poderá ser consultada na conta aberta de X (antigo twitter): @incendios085.