Santiago de Compostela, 28 de xullo de 2026

O conselleiro de Sanidade, Antonio Gómez Caamaño, sinalou hoxe o dispositivo sanitario especial da Festa do Albariño como exemplo da planificación estival do Servizo Galego de Saúde, destinado a ofrecer seguridade e unha resposta sanitaria áxil e eficaz.

O titular da carteira sanitaria da Xunta, acompañado polo director xeral de Atención Primaria e Comunitaria do Servizo Galego de Saúde, Salvador Mariño-Ageitos, e o xerente da área sanitaria de Pontevedra e O Salnés, José Flores, realizou unha visita ao centro de saúde de Cambados.

O conselleiro explicou que o Servizo Galego de Saúde traballa en coordinación co Concello na organización do dispositivo, que conta cun posto sanitario avanzado, dotado cunha UVI móbil, un médico e demais profesionais sanitarios para dar resposta inmediata ás incidencias.

O pasado ano, ese posto sanitario realizou 665 asistencias sanitarias durante os cinco días da Festa do Albariño, a maioría resoltas in situ, demostrando a eficacia da planificación e a coordinación.

En previsión das incidencias de maior alcance que teñen que ser atendidas nos centros sanitarios habituais, o conselleiro explicou que o PAC de Cambados se reforza desde o venres e durante toda a fin de semana cun terceiro equipo. Así mesmo, tamén se  reforzan as urxencias do Hospital do Salnés.

Gómez Caamaño fixo un chamamento a que a xente desfrute da festa con prudencia e responsabilidade e incidiu en que están activadas as medidas para atender as necesidades sanitarias extraordinarias.

Tamén puxo en valor o esforzo dos profesionais que garanten a asistencia sanitaria nas zonas costeiras mentres a xente está de vacacións.

Ao respecto, Gómez Caamaño referiu que a Consellería de Sanidade é consciente do incremento da poboación, da actividade e dos desprazamentos que se producen durante o verán nesta zona e, por iso, adóptanse medidas extraordinarias, como o aumento dos medios do 061 e do Hospital do Salnés.

Actividade do centro de saúde

Na súa visita, o conselleiro quixo escoitar aos profesionais e comprobar de primeira man como está a funcionar este centro de saúde, logo de transcorrido un ano de pasar de xestión municipal a ser xestionado directamente polo Servizo Galego de Saúde.  

Gómez Caamaño puxo este centro como exemplo da capacidade asistencial da atención primaria, posto que dá servizo a máis de 15.700 persoas e conta cun equipo multidisciplinar (médicos, pediatras, enfermeiros, odontólogos, nutricionistas, entre outros), que permiten ofrecer unha atención integral.

A capacidade do centro tradúcese en actividade, xa que, só neste mes de xullo, realizáronse nas súas dependencias máis de 16.000 consultas, o que evidencia a importancia destas instalacións da rede do Sergas.

Gómez Caamaño lembrou que a Xunta reforzou este centro nos últimos anos cun importante investimento en equipamento diagnóstico e asistencial (ecógrafos, holters, desfibriladores e outro material), que achega máis capacidade resolutiva aos profesionais sen necesidade de derivacións.

Ademais, o centro acolle o PAC, que presta asistencia a preto de 28.000 persoas.

Reforma da atención primaria

Gómez Caamaño aproveitou a visita para expresar o firme compromiso da Xunta coa atención primaria, que se plasma nunha reforma integral deste nivel asistencial que se está a ultimar e que se presentará no mes de setembro.

A reforma posibilitará reducir a burocracia dos médicos para que poidan dedicar máis tempo aos pacientes. Ademais, reorganizará as axendas dos profesionais e incorporará novas categorías nos centros de saúde, como é o caso dos podólogos, para permitir ofrecer unha atención cada vez máis completa.