Santiago de Compostela, 4 de agosto 2026

As obras de reforzo de firme na autovía do Barbanza (AG-11) farán necesarios cortes parciais de calzada a partir do xoves día 6, e ata o vindeiro martes día 11, ambos incluídos. A intervención desenvolverase tamén en fin de semana.

En concreto, levarase a cabo o corte da calzada dereita da AG-11 na saída 19 da autovía, no enlace Taragoña sentido Ribeira. Neste caso, e para facilitar a accesibilidade do tráfico, abrirase transfer e circularase pola calzada esquerda da autovía.

Este corte parcial é necesario para acadar unha maior seguridade dos usuarios da autovía e dos traballadores da obra e para poder avanzar nos traballos de acondicionamento de firme da AG-11.

As actuacións de reforzo de firme na autovía do Barbanza faranse por tramos de aproximadamente 4 km, co obxectivo de garantir en todo momento a continuidade da circulación. Para acometer os traballos de acondicionamento de firme executaranse cortes parciais de calzada en ambas as marxes da autovía, de forma progresiva e sectorizada, alternando os sentidos de circulación en función das necesidades derivadas dos traballos.

Para iso habilitaranse os correspondentes transfers de tráfico, adaptados ás diferentes fases de obra e ás condicións de execución. Durante os traballos na calzada esquerda, o tráfico correspondente a ambos os sentidos de circulación canalizarase pola calzada dereita, investíndose esta disposición cando os traballos se desenvolvan na calzada dereita.

Os puntos de transferencia entre calzadas serán debidamente sinalizados e balizados, mediante os correspondentes pasos de mediana.

Con esta nova actuación da Xunta, trátase de intervir nos algo máis de 40 quilómetros da AG-11, incluíndose nas actuacións a acometer a renovación do firme existente en tronco e enlaces, con actuacións puntuais de reparación e renovación da capa de rodaxe. 

O contrato, adxudicado por máis de 10,5M€, inclúe tamén a revisión do estado da sinalización horizontal e substitución da mesma en caso de ser necesario; a Instalación dos elementos necesarios de balizamento en todo o tramo; así como a renovación das xuntas de dilatación das estruturas do tronco presentes no tramo. 

Tamén se prevén dúas actuacións complementarias a maiores, que redundan na mellora da seguridade viaria na autovía do Barbanza.