Ribeira (A Coruña), 4 de setembro de 2026

A conselleira de Política Social e Igualdade, Fabiola García, visitou hoxe o comercio de produtos infantís Os Nenos, en Ribeira, acompañada da alcaldesa da localidade, María Sampedro. Alí, destacou a Tarxeta Benvida da Xunta como unha medida esencial para apoiar as familias galegas.

Fabiola García lembrou que o Goberno autonómico destina anualmente preto de 32 millóns de euros á Tarxeta Benvida, unha axuda directa aos pais cunha contía media de 1.200 euros durante o primeiro ano de vida do fillo ou filla. Unha cantidade que pode ser de ata 3.000 euros, xa que se duplica para o terceiro fillo e sucesivos e incrementase nun 25% para as familias que viven en concellos de menos de 5.000 habitantes.

Desde a posta en marcha da Tarxeta Benvida, hai dez anos, son xa arredor de 120.000 as familias galegas que se teñen beneficiado desta achega, que se pode solicitar a partir da semana 21 de xestación. Con esta tarxeta poden mercar nos establecementos adheridos produtos para os seus bebés, desde xoguetes a berces ou produtos de farmacia.

Esta medida da Xunta, xa consolidada como un referente nas políticas públicas de apoio ás familias, é unha das iniciativas coas que o Executivo autonómico amosa o seu compromiso co benestar e a conciliación dos fogares galegos. Como son  o Bono Concilia Familia, que facilita a nais e pais compaxinar a vida persoal e laboral, e outras pioneiras como a gratuidade da educación infantil de 0 a 3 anos ou a rede de casas niño no rural.