Pontevedra, 25 de setembro de 2026

A directora xeral de Formación e Cualificación para o Emprego, Zeltia Lado, asistiu hoxe á primeira sesión da iniciativa Xunta Conecta, celebrada na oficina de emprego de Pontevedra e que consiste en xornadas grupais con empresas —neste caso con Leroy Merlin— nas que se combina información sobre as oportunidades de emprego cun proceso de entrevistas rápidas a persoas demandantes de emprego. Deste xeito, o Goberno galego consolida o servizo de orientación laboral da man das empresas potenciando a empregabilidade da cidadanía e atendendo as demandas de man de obra do tecido produtivo.

A directora xeral explicou que esta iniciativa se enmarca na potenciación do Servizo Público de Emprego de Galicia e ten como fin casar oferta e demanda laboral reforzando a atención ás persoas desempregadas a prol da súa inserción laboral e ás empresas para dar cobertura ás súas vacantes.

En concreto, esta sesión céntrase nos perfís de persoas vendedoras, asesoramento á clientela e venda de produtos e servizos, loxística, recepción de mercadoría, xestión de stock, tarefas de almacén, asistente de relación coa clientela, atención á clientela, xestión de pagamentos e apoio en ferramentas dixitais.

Para cubrir estes perfís, é a propia empresa a que se despraza á oficina de emprego para entrevistar directamente as persoas demandantes, nunhas entrevistas duns 10 minutos nas que estas entregan o seu currículo e reciben información sobre os postos de traballo e os perfís profesionais que necesita a empresa. Deste xeito, a oficina de emprego convértese nun punto de encontro directo entre empresas e persoas candidatas, reforzando o seu papel como peza central do ecosistema laboral da comarca. A sesión inclúe tamén obradoiros nos que se difunden claves para a busca de emprego e para superar con éxito unha entrevista de traballo.

Xunta Conecta continuará con máis sesións organizadas a medida atendendo á demanda do tecido produtivo, da que tamén depende o número de participantes en cada sesión. Con esta actividade, o Goberno galego busca impulsar un sistema de orientación laboral territorializado e orientado a achegar os servizos tanto á cidadanía como ás empresas.

Outras accións a prol da potenciación do SPEG

Outras accións a prol da potenciación do SPEG son as relacionadas coa súa modernización, —ámbito que conta este ano cun orzamento de 8 M€–. Entre elas a aplicación móbil de EMi, que se prevé que estea operativa nos próximos meses. Esta ferramenta que se apoia na intelixencia artificial está dispoñible nas 54 oficinas de emprego e xa permitiu realizar máis de 118.000 perfilados competenciais. Tamén os novos simuladores de entrevistas de traballo baseados na IA dispoñibles en fase piloto en 17 das 54 oficinas do SPEG e que reforzan o traballo do persoal orientador.

A isto engádense as melloras introducidas na Oficina Virtual de Emprego, que permiten realizar novos trámites e comunicarse directamente coa oficina, así como aos caixeiros de autoservizo implantados nas 54 oficinas do SPEG para facilitar as xestións máis habituais, reducir a carga administrativa e reforzar o labor do persoal técnico. Estes dispositivos chegarán tamén progresivamente aos concellos rurais co obxectivo de achegar os servizos de emprego á cidadanía destas contornas.