Lugo, 25 de setembro de 2026

Os alumnos do Centro Integrado de FP As Mercedes e do Instituto Sanxillao poderán empregar distintas instalacións municipais para mellorar a súa formación a partir do vindeiro curso. Para facelo posible, o conselleiro de Educación, Ciencia, Universidades e FP, Román Rodríguez, e a alcaldesa de Lugo, Elena Candia, asinaron hoxe dous convenios de colaboración, nun acto no que participou tamén o delegado territorial da Xunta en Lugo, Alfonso Villares, e a directora xeral de FP, Eugenia Pérez.

Ao abeiro destes acordos os estudantes dos ciclos de grao medio en Emerxencias e Protección Civil e de grao superior en Coordinación de Emerxencias e Protección Civil do CIFP As Mercedes poderán empregar parte das instalacións municipais do Parque de Bombeiros. A Consellería de Educación será a responsable de aportar o persoal docente necesario e asumir os gastos de material funxible e de produtos consumibles necesarios para o desenvolvemento das ensinanzas obxecto deste convenio. Tamén o equipamento preciso, aínda que os estudantes poderán empregar o dispoñible no propio Parque. Cómpre destacar que esta colaboración permite ao centro lucense ser o único centro público en Galicia que oferta estes dous ciclos.

Ademais, o Concello de Lugo porá a disposición do IES Sanxillao dous días ao mes o posto número 16 da Praza de Abastos para o desenvolvemento de proxectos e actividades formativas vinculadas á gastronomía e á hostalaría, ámbitos nos que está especializado o centro educativo. Neste caso, a materia prima necesaria poderá ser subministrada polos produtores da Praza de Abastos ou do Mercado Municipal de Lugo que decidan colaborar voluntariamente en cada actividade. Ademais de para mellorar a formación dos estudantes, a presenza dos mesmos nestas instalacións servirá tamén para difundir a oferta formativa do instituto.

Colaboración institucional

O titular do departamento educativo do Goberno galego puxo en valor a colaboración institucional que está a prestar o Concello de Lugo no ámbito educativo. Neste sentido, lembrou que hai menos de dous meses se asinou co Goberno municipal outro acordo para estender a máis cidadáns o uso das instalacións deportivas dos centros de ensino.

No caso concreto dos convenios asinados hoxe “van contribuír de xeito decisivo a ofrecer unha cualificación máis completa aos estudantes de Formación Profesional, porque lles vai permitir estar en contacto con instalacións e equipamentos reais de traballo”, sinalou o conselleiro. “Son unhas circunstancias e situacións que podemos simular nos centros, e de feito o facemos, pero que achegan un valor engadido moi importante ao alumnado se se fan nunha contorna real e co complemento da experiencia das persoas que alí traballan”, salientou.

Éxito do equipo de automobilismo

O conselleiro de Educación, o delegado e a directora xeral achegáronse tamén esta mañá ata o Centro Integrado de FP As Mercedes para felicitar ao piloto lucense Alonso Liste polos éxitos da tempada, na que alcanzou o terceiro posto da súa categoría no Campionato Europeo de Montaña e se asentou entre os 10 mellores pilotos da clasificación xeral.

Cómpre lembrar que alumnos e docentes das Mercedes traballaron durante meses para perfeccionar a mecánica e a aerodinámica do monopraza co que competiu Alonso Liste. Ademais, en cada unha das probas do campionato participou un alumno e un profesor, encargándose da asistencia en carreira.

Neste sentido, Román Rodríguez puxo en valor esta experiencia como “unha gran oportunidade para que os alumnos apliquen os coñecementos adquiridos no ciclo e coñezan de primeira man as esixencias técnicas dunha competición”. O CIFP As Mercedes e Alonso Liste traballan xa no seguinte campionato e, de feito, xa están a preparar o vehículo e a mellora do seu motor.