Santiago de Compostela, 4 de outubro de 2026

Un total de 65 universitarios galegos resultan beneficiarios das axudas convocadas pola Xunta para participar durante este curso 2026/27 en programas de mobilidade con países extracomunitarios. A Consellería de Educación, Ciencia, Universidades e Formación Profesional vén de publicar no Diario Oficial de Galicia (DOG) a resolución desta convocatoria, dirixida ao alumnado das universidades galegas que realiza estadías académicas fóra da Unión Europea.

O obxectivo desta liña de axudas, que conta cun orzamento total de 310.000 €, é favorecer a participación da mocidade galega en experiencias de mobilidade internacional que contribúan á mellora das súas competencias lingüísticas e ao seu enriquecemento cultural. Estas estadías permiten ao alumnado integrarse noutras comunidades e ampliar os seus coñecementos e experiencias tanto no ámbito académico e profesional como no persoal.

Entre os destinos elixidos nesta convocatoria destacan Chile, Arxentina e Estados Unidos. Chile concentra a maior parte das mobilidades, seguido de Arxentina e Estados Unidos, aínda que o alumnado se despraza tamén a outros países de América, Asia e Oceanía.

Para acceder a estas bolsas, o alumnado debe estar matriculado no curso 2026/27 nalgún grao das universidades participantes na convocatoria. Esta iniciativa forma parte do amplo abano de actuacións que o Goberno galego desenvolve a través do programa Galemundo, dotado con 18 millóns de euros para impulsar a aprendizaxe de idiomas entre a comunidade educativa galega.

Con estas medidas, a Xunta continúa a facilitar que o alumnado universitario teña acceso a experiencias formativas internacionais que complementen a súa formación e lle permitan coñecer outras linguas, culturas e contornas académicas.