Vigo, 25 de setembro de 2026

A secretaria xeral de Emprego e Relacións Laborais, Susana Pérez Iglesias, xunto coa directora xeral de Traballo Autónomo e Economía Social, Marta Mariño, participou hoxe en Vigo na 4ª edición do foro empresarial Vertical Summit, onde puxo de relevo a aposta da Xunta por impulsar o ecosistema emprendedor a través da futura Estratexia de Emprendemento ligado ao Territorio, na que segue avanzando o Goberno galego da man de todos os axentes en Galicia. Neste sentido, esta folla de ruta ten entre os seus fins o acompañamento ás persoas emprendedoras en todo o ciclo do seu proxecto.

Un cometido, engadiu, que se reflicte na Rede de polos de emprendemento e apoio ao emprego, que nas súas 15 oficinas leva atendidos máis de 7.200 proxectos, tanto de persoas que queren poñer en marcha a súa idea de negocio como das que queren consolidala. Ademais referiuse á rede de colaboración público-privada Ultreia, nacida para reforzar o ecosistema e da que na actualidade forman parte máis de 150 entidades. Entre outras medidas, tamén salientou a aposta autonómica por atraer talento emprendedor e de nómades dixitais ao rural galego, con proxectos como Fixar ou Muimenta Viva, así como os apoios ao colectivo de autónomos onde destaca a orde unificada de preto de 41 M€ que cubre todo o ciclo do emprendemento e da que remata o prazo de solicitudes o vindeiro 30 de setembro.