A Xunta presenta unha exposición para descubrir a Economía Social a través de seis experiencias galegas
A iniciativa enmárcase no proxecto europeo ES-Factory, cofinanciado pola Unión Europea, que busca impulsar novas oportunidades de emprendemento e emprego de calidade en Galicia e no norte de Portugal
A mostra poderá visitarse os días 22 e 23 de outubro en Vigo e o 26 e o 27 en Lugo, e inclúe paneis, contidos audiovisuais e información sobre ferramentas de apoio ao desenvolvemento empresarial
Santiago de Compostela, 21 de outubro de 2026
A Xunta de Galicia, a través da Consellería de Emprego, Comercio e Emigración, promove a exposición Economía Social. Proxectos que transforman, unha iniciativa destinada a achegar á cidadanía os valores, as oportunidades e o impacto da economía social. A mostra poderá visitarse os días 22 e 23 de outubro na Delegación Territorial da Xunta en Vigo e o 26 e o 27 de outubro na Facultade de Administración e Dirección de Empresas de Lugo.
A exposición enmárcase no proxecto europeo ES-Factory, desenvolvido no marco do Programa Interreg España-Portugal (POCTEP) e cofinanciado pola Unión Europea, que ten como obxectivo impulsar a economía social e fomentar novas oportunidades de emprendemento e emprego de calidade en Galicia e no norte de Portugal.
A través de dez paneis expositivos e tres pantallas con contidos audiovisuais, a mostra dá a coñecer seis experiencias galegas representativas de diferentes modelos de economía social: Hornos de Lamastelle e Juan María Sin Etiquetas, centros especiais de emprego; Arroupa Moda Re-, empresa de inserción laboral; Buscalume e Elefantes Rosas, sociedades cooperativas; e Lugar da Veiga, sociedade laboral.
Estas iniciativas exemplifican como empresas de sectores diversos poden combinar a actividade económica coa creación de emprego, a inclusión social, a participación das persoas traballadoras e o compromiso co territorio, situando as persoas e o interese colectivo no centro da súa actividade.
Ademais, a exposición ofrece información sobre as distintas fórmulas empresariais que integran a economía social e presenta ferramentas impulsadas no marco do proxecto ES-Factory, como a Rede de Aceleradoras e o Observatorio de Economía Social de Galicia e do Norte de Portugal, orientadas a favorecer o desenvolvemento e a consolidación deste modelo empresarial. A mostra está dirixida tanto ao público xeral como ao alumnado e ás persoas emprendedoras, co propósito de visibilizar a economía social como unha alternativa empresarial que contribúe a xerar novas oportunidades económicas, promove a inclusión e reforza o desenvolvemento sostible do territorio.
