O 90% das prazas de novo ingreso da oferta de emprego de educación foron adxudicadas nas oposicións

O 90% das 2276 prazas de novo ingreso convocadas na oferta de emprego público de educación foron adxudicadas nas oposicións que se veñen de celebrar. Así, os 373 tribunais responsables de deseñar e aplicar as probas e de valorar os aspirantes consideraron aptos para obter praza a 2027 aspirantes.

Deste xeito, as prazas quedaron completamente cubertas en 59 especialidades (un total de 1453 prazas). Noutras sete especialidades cubríronse o 90% ou máis das prazas convocadas (222 prazas adxudicadas sobre un total de 238). Os datos resumidos poden consultarse na seguinte táboa:

Só en nove especialidades moi concretas quedaron sen cubrir máis da metade das prazas. Trátase, no corpo de profesores técnicos de Formación Profesional, das especialidades de Estética, Operacións e equipos de elaboración de produtos alimentarios, Mecanizado e mantemento de máquinas, Fabricación e instalación de carpintería e moble, Sistemas e aplicacións informáticas e Instalacións e mantemento de equipos térmicos e de fluídos; e no corpo de profesores de ensino secundario as especialidades de Procesos e produtos en madeira e moble, Organización e proxectos sistemas enerxéticos e Navegación e instalacións mariñas.

En calquera caso, a Consellería de Cultura, Educación e Universidade garante a presenza do profesorado necesario aos centros educativos mediante o habitual sistema de interinos e substitutos. Cómpre sinalar tamén a utilidade do proceso de oposicións de educación para estabilizar este tipo de persoal. Non en balde, dos interinos e substitutos presentados obtiveron praza o 68,13%.

Preto de 17.000 participantes

Nas oposicións de educación participaron finalmente un total de 16.772 persoas, o 66,7% dos inscritos. Deles, 1381 eran interinos ou substitutos. A Consellería valora moi positivamente o éxito co que se desenvolveu o proceso, o máis amplo en educación e no contexto dunha pandemia.

Dos que obtiveron praza, o 29,5% foron homes e o 70,5% foron mulleres. Por idade, o 2,4% teñen entre 20 e 25 anos, o 21,8% entre 25 e 30 anos, o 21,2% entre 30 e 35 anos, o 17,7% entre 35 e 40 anos e o 36,6% entre 40 e 65 anos.

Novos procesos

A Xunta de Galicia ten xa aprobada a OPE de educación que se executará en 2022, con 1604 prazas (1372 delas de novo ingreso). En concreto, a próxima oferta de emprego público da Consellería de Cultura, Educación e Universidade contará coa seguinte distribución de prazas:  

Deste xeito, elévase a 10.655 o número de prazas convocadas polo Goberno galego no eido educativo nos últimos cinco anos (2017-2021), reafirmando o compromiso da Xunta coa calidade do ensino, promovendo as mellores condicións para o seu piar fundamental, o profesorado. Non en balde, a finalidade última é avanzar na estabilización dos docentes, a pesares da redución do alumnado pola caída da natalidade.