A delegada territorial da Xunta en Ferrol visitou a execución da nova infraestrutura situada na Casa do Mar
Martina Aneiros supervisa as obras do albergue de peregrinos que estarán concluídas a comezos de ano
Actualmente estanse a concluír os labores de división dos espazos con paneis de pladur e as instalacións eléctricas e de fontanería
As obras contan cun investimento de 467.000 euros e permitirán a creación de 60 prazas para o aloxamento dos peregrinos do Camiño Inglés
A delegada territorial da Xunta en Ferrol, Martina Aneiros, realizou esta mañá unha visita ás obras do albergue de peregrinos que se está a habilitar nunha parte do edificio da Casa do Mar. A representante do Goberno autonómico, acompañada polos responsables da obra, comprobou o bo avance dos traballos iniciados o pasado mes de xullo.
As obras contan cun investimento de 467.000 euros da Xunta de Galicia, a través de Turismo de Galicia. Permitirán habilitar de 60 prazas -dúas delas adaptadas- para o aloxamento dos peregrinos do Camiño Inglés. Na planta inferior estará situado o acceso, a sala común e a oficina, e na planta superior, os dormitorios e os aseos.
Aneiros apuntou á importancia desta nova infraestrutura para a cidade en tanto “Ferrol é un símbolo do Camiño Inglés xa que era por Ferrol por onde chegaban por mar peregrinos do Norte de Europa e das illas británicas, para comezar aquí e rematar en Santiago”, sinalou.
O novo albergue sumarase aos 6 cos que conta a rede pública no Camiño Inglés, a cuarta máis transitada por aqueles que se achegan a Santiago a recoller a Compostela e unha das que nos últimos anos máis está a medrar, cun incremento do 25% de peregrinos.
Desde a Xunta estase a fomentar a ruta xacobea e o turismo familiar a través da campaña O Camiño en familia. Pet Camiño, centrada precisamente en potenciar o Camiño Inglés para que sexa unha ruta adaptada as necesidades do turismo familiar ou con mascotas.
“Para iso vanse a ampliar as infraestruturas públicas enfocadas ás familias na ruta, adaptar os establecementos turísticos as súas necesidades e impulsar a atención veterinaria 24 horas así como habilitar as credenciais tamén para as mascotas”, avanzou a delegada territorial.