O Diario Oficial de Galicia publica hoxe a orde de incentivos ao sector do taxi para o ano 2023
Destinaranse 300.000 € á compra de taxis adaptados, 140.000 € para vehículos de baixas emisións e 60.000 € para taxis de emisións cero
Os inventivos son de ata 4.000 € para os taxis de baixas emisións, 6.000 € para vehículos de emisións cero e 10.000 € para coches adaptados á mobilidade reducida
O prazo de presentación de solicitudes comezará mañá e estendese ata o 14 de outubro do vindeiro ano
A Xunta, desde 2016, leva concedidas axudas por importe de 4,5 M€ que facilitaron a compra de 254 taxis adaptados, 461 de baixas emisións e 30 de emisións cero
O Goberno galego, a través destes incentivos, apoia aos profesionais do taxi, un sector que en Galicia dá emprego a máis de 3.600 familias
Santiago de Compostela, 24 de novembro de 2022 A Xunta publica hoxe unha nova convocatoria das axudas para incentivar a adquisición de taxis adaptados á mobilidade reducida, e de emisións cero ou categoría ECO, que suporán un investimento de 500.000 euros.
A Consellería de Infraestruturas e Mobilidade recolle hoxe no Diario Oficial de Galicia esta orde de incentivos para o ano 2023, dirixida aos titulares de autorizacións administrativas de transporte vixentes, documentadas en tarxetas da serie VT-N, expedidas pola Dirección Xeral de Mobilidade.
A liña para a compra de taxis adaptados e accesibles a persoas con mobilidade reducida, os chamados eurotaxis, está dotada con 300.000 euros; para a adquisición de taxis de baixas emisións resérvase unha partida de 140.000 euros; e os 60.000 euros ata completar o importe desta convocatoria irá destinada a financiar taxis de cero emisións.
Estes incentivos, que son compatibles entre si, ascenden a 10.000 euros para o caso da compra de eurotaxis; a 6.000 euros para vehículos de emisións cero; e a 4.000 euros para a compra de taxis de baixas emisións.
Os prazos serán diferentes para as distintas liñas de incentivos. No caso das axudas para taxi de emisións cero ou ECO poderán ser obxecto de subvención os vehículos novos que se adquiran entre o 15 de xullo de 2022 e o 31 de outubro de 2023.
Ademais, os beneficiarios da subvención asumen a obriga de ter adscrito o vehículo á autorización de transporte da serie VT-N antes do 1 de xullo de 2024.
A Xunta, desde 2016, leva concedidos incentivos ao sector do taxi por 4,5 millóns de euros que facilitaron a compra dun total de 745 vehículos. En concreto, baixo estes incentivos adquiríronse 254 vehículos adaptados, 461 taxis de baixas emisións e 30 de emisións cero.