A delegada territorial da Xunta en Ferrol, Martina Aneiros, presentou o proxecto de mellora coincidindo co inicio da información pública, que hoxe se recolle no DOG
A Xunta de Galicia investirá 2,3 M€ en mellorar a accesibilidade de 69 paradas de autobús en estradas autonómicas da zona sur de Ferrol
Aneiros explica que o plan permitirá actuar nas paradas de oito estradas autonómicas dos municipios de Ares, Fene, Mugardos e Neda
Sinala que as actuacións garantirán a conectividade a través da execución de sendas e beirarrúas, e a accesibilidade das persoas con dificultades de mobilidade, coa construción de ramplas de acceso e dotando a contorna de pavimento podotáctil
A iniciativa enmárcase no Plan de Infraestruturas da Xunta para unha mobilidade segura, verde e intelixente
A previsión é actuar en máis de 1.100 paradas nas estradas autonómicas co fin de mellorar a seguridade e a accesibilidade cun investimento de arredor de 35M€
Neda (A Coruña), 30 de decembro de 2022.-
A delegada da Xunta en Ferrol, Martina Aneiros, acompañada dos alcaldes de Neda, Ángel Alvariño; Mugardos, Juan Domingo de Deus; Fene, Juventino Trigo, e Ares, Julio Iglesias, presentou esta mañá o Plan de mellora da seguridade e accesibilidade das paradas de autobús nas estradas autonómicas da zona sur de Ferrol, que suporá un investimento autonómico de 2,3 M€.
Aneiros achegouse, xunto ao xefe territorial de Infraestruturas, José Antonio Álvarez, á Avenida Algeciras, á altura do número 63, unha vía na que se levarán a cabo 12 actuacións, segundo recolle o proxecto da Consellería de Infraestruturas e Mobilidade.
Informou de que o Diario Oficial de Galicia (DOG) publica hoxe o anuncio polo que se somete a información pública este proxecto a efectos expropiatorios e para que os interesados poidan facer as súas achegas. O proxecto prevé actuacións nun total de 69 paradas de autobús. A súa maioría, un total de 32, detallou Martina Aneiros, sitúanse no concello de Neda, mentres que 17 corresponden ao municipio de Mugardos, 16 ao de Fene e as catro restantes ao de Ares.
A delegada territorial apuntou que o obxectivo das intervencións que se van a levar a cabo é reforzar a seguridade, mellorar o equipamento das paradas de autobús e favorecer a mobilidade e a accesibilidade na súa contorna. “Somos conscientes de que as paradas son o primeiro elemento de contacto entre o usuario e o transporte público”, remarcou Aneiros.
A representante da Xunta avanzou que as intervencións previstas garantirán a accesibilidade, pensando especialmente nas persoas con dificultades de mobilidade, para o que se executarán ramplas de acceso e se dotará á contorna das paradas de pavimento pododáctil. Ademais o programa pretende favorecer a conectividade das paradas, a través da construción de beirarrúas e sendas peonís.
Tamén se mellorará o equipamento das paradas, coa dotación de novos refuxios que protexan os usuarios fronte ás inclemencias do tempo, bancos e apoio isquiático que ofrezan comodidade aos viaxeiros durante a espera.
Martina Aneiros tamén se referiu ao esforzo da seguridade das paradas, ampliando o espazo, mellorando a sinalización e incidindo na velocidade. Ademais eliminarase a vexetación da contorna e mellorarase a visibilidade e a iluminación, para facelas máis seguras.
No cómputo da Comunidade autónoma, a Xunta investirá arredor de 35 M€ en reformar máis de 1.100 paradas de autobús en estradas autonómicas a través de distintos proxectos como o presentado hoxe para a zona sur de Ferrol.
Estas actuacións serán financiadas ao abeiro do Plan de recuperación, transformación e resiliencia da Unión Europea-Next Generation EU e enmárcase no Plan de infraestruturas da Xunta para unha mobilidade segura, verde e intelixente.
NÚMERO DE PARADAS POR CONCELLO E ESTRADA
Concello Estrada | Ares | Fene | Mugardos | Neda | total |
AC-115 | 2 | 17 | 19 | ||
AC-121 | 2 | 2 | |||
AC-122 | 1 | 2 | 3 | ||
AC-123 | 1 | 1 | 2 | ||
AC-125 | 1 | 1 | |||
AC-130 | 1 | 2 | 3 | ||
AC-133 | 2 | 13 | 12 | 27 | |
AC-862 | 12 | 12 | |||
total | 4 | 16 | 17 | 32 | 69 |
Infografía do resultado das actuacións de mellora que se van acometer nas paradas