Rivo destaca as iniciativas de conciliación promovidas pola Xunta en período non lectivo na súa visita ao programa de lecer de Semana Santa da Guarda

A Guarda (Pontevedra), 27 de marzo de 2024

A conselleira de Promoción do Emprego e Igualdade en funcións, Elena Rivo, visitou hoxe o centro escolar A Sangriña, onde o Concello da Guarda está a celebrar, co apoio da Xunta de Galicia, a actividade Concilia Semana Santa, na que toman parte nenas e nenos de entre tres e dez anos deste municipio.

A acción, apoiada pola Xunta de Galicia no marco do Plan Corresponsables, quere favorecer a conciliación da vida persoal e laboral das familias da Guarda, facilitándolles un recurso de apoio nestes días de inactividade escolar.

A proposta ten o atractivo engadido de ofrecer un espazo de lecer en horario de mañá para trinta e un menores escolarizados, aos que se oferta unha axenda de actividades lúdicas e obradoiros adaptados aos seus intereses.

Trátase dun programa gratuíto, vital para que a veciñanza da Guarda poida conciliar vida persoal, laboral e familiar, que pon ao seu dispor un servizo de coidado de 8,30 a 14,30 horas os días 25, 26, 27 e 1 de abril.

Rivo comprobou a utilidade e o éxito destas propostas, necesarias para seguir a impulsar en Galicia iniciativas que permitan avanzar cara benestar laboral.

A Administración autonómica está a destinar este ano case 11 millóns de euros en axudas para apoiar ás entidades locais galegas no impulso da igualdade, no funcionamento dos Centros de Información á Muller (CIM) e para avanzar na conciliación e corresponsabilidade. En concreto, 6 millóns diríxense a este último propósito, con accións encamiñadas a favorecer a conciliación e a corresponsabilidade no eido local, que se financian cos fondos recibidos por Galicia do Estado,  a través do Plan Corresponsables. 

Grazas a este plan, Galicia está a ofertar actividades durante todo o ano e especialmente en períodos non lectivos para menores de ata 16 anos en diferentes eidos: desde actuacións lúdicas, campamentos en diversas disciplinas deportivas ata obradoiros adaptados a distintos grupos de idade.

En colaboración con entidades e concellos, entre eles o da Guarda, estanse a habilitar servizos de coidado profesional para que os rapaces poidan aprender e divertirse ao tempo que permite aos pais e nais a conciliación da vida, persoal, laboral e familiar.

O Plan Corresponsables contribúe tamén a xerar emprego coa contratación de persoas coidadoras e monitores para cada unha das actividades que se desenvolven.