Controlado o incendio forestal do concello ourensán de Oímbra, parroquia da Granxa
Segundo as últimas estimacións, o lume, que afecta a zona transfronteiriza con Portugal, abrangue unha superficie de arredor de 20 hectáreas en territorio español
Santiago de Compostela, 17 de abril de 2024
A Consellería do Medio Rural informa de que un incendio forestal rexistrado no concello ourensán de Oímbra, parroquia da Granxa, está controlado dende as 10,07 h. desta mañá.
O lume iniciouse onte ás 23,19 h. e, segundo as últimas estimacións provisionais, abrangue unha superficie de arredor de 20 hectáreas en territorio español (afectou tamén a Portugal). A hora de inicio do lume -a súa nocturnidade- e o feito de que se rexistraran dous puntos simultáneos de inicio, apunta a unha clara intencionalidade. Polo de agora, mobilizáronse para a súa extinción 3 axentes, 8 brigadas e 5 motobombas.
A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais poderá ser consultada na conta aberta de twitter: @incendios085.
