Pontevedra, 20 de setembro de 2024

O secretario xeral de Emprego e Relacións Laborais, Pablo Fernández, participou hoxe na inauguración do 11º Espazo de Emprendemento Pont-Up Store 2024, organizado pola Asociación para o Emprendemento e a Innovación Pont-Up Store e apoiado pola Xunta. Posteriormente, entregou os galardóns da 1ª convocatoria de premios a traballos de fin de grao e de fin de mestrado e a teses de doutoramento en temáticas relacionadas co emprendemento -no marco do convenio ao efecto asinado entre a Xunta e a Universidade de Vigo- e presentou o Xogo do emprendemento dirixido a alumnado de ESO, co gallo de animar ás novas xeracións a crear os seus propios negocios.

Esta última iniciativa enmárcase no posto do evento que dará a coñecer -entre outros- o labor da Rede de polos de emprendemento e que contará con actividades organizadas pola Consellería de Emprego, Comercio e Emigración en colaboración coas de Economía e Industria e de Política Social e Igualdade.

En concreto, no posto da Xunta resolveranse -entre outras- dúbidas sobre os Polos de emprendemento, ademais da dinamización, xogos e presenza de persoas emprendedoras beneficiarias da Rede, para expor e presentar os seus produtos ou servizos. Canto ás actividades do Goberno autonómico, ademais do xogo do emprendemento mencionado, haberá unha xornada de networking e unha mesa redonda sobre axudas do ecosistema emprendedor, entre elas as axudas de emprendemento feminino do Programa Emega da Consellería de Política Social e Igualdade, que ten activo o prazo de solicitude ata o próximo 27 de setembro.

No acto, o secretario xeral referiuse ao Pont-Up Store como un referente para proxectos emprendedores, tanto do ámbito urbano como do rural. A cita, destacou Fernández, contribúe a promover a cultura do emprendemento e favorece un espazo de relación e intercambio de experiencias.

Programa Ultreia

Precisamente no marco da aposta pola creación de novos negocios e o desenvolvemento de proxectos innovadores, Pablo Fernández lembrou que o próximo 25 de setembro chegará a Pontevedra o programa Ultreia Galicia Rexión Emprendedora, retos e solucións para un territorio intelixente, financiado pola Unión Europea, a través do Plan de Recuperación, Transformación e Resiliencia.

Desenvolvido pola Xunta en colaboración coas confederacións empresariais provinciais e galega, o programa Ultreia promoverá encontros de emprendemento nas catro provincias coa participación de 240 axentes do ecosistema emprendedor, máis de 160 startups, 40 empresas tractoras de distintos sectores estratéxicos e 16 casos de éxito.

Deste xeito, busca incentivar aos emprendedores e axentes do ecosistema a impulsar a súa actividade creando sinerxías e identificando retos para atopar solucións conxuntas.