Santiago de Compostela, 4 de novembro 2024

A Xunta publica hoxe no Diario Oficial de Galicia (DOG) a orde de axudas para financiar os gastos do servizo de comedor das escolas infantís de iniciativa social, nas que a atención educativa xa é 100% gratuíta para todas as familias usuarias. O orzamento desta convocatoria de subvencións para o presente curso 2024-2025 supera os 1,2 millóns de euros.

Esta liña de achegas permite que estas escolas dependentes de entidades sociais sen ánimo de lucro oferten o seu servizo de comedor a prezos reducidos, é dicir, co mesmo custo que rexe para as escolas infantís da rede pública autonómica. Así, as familias que leven aos seus fillos pagarán o comedor en función das súas rendas, sendo o prezo máximo abonar de 74 euros mensuais. As familias con menos ingresos terán o servizo de comedor gratuíto.

As escolas de 0 a 3 anos de iniciativa social teñen un mes de prazo, contado a partir de mañá, para pedir estas axudas ás que se acolleron o ano pasado un total de 43 centros, sumando un total de 2.172 prazas. As solicitudes deberán presentarse obrigatoriamente por medios electrónicos a través do formulario dispoñible na sede electrónica da Xunta de Galicia.