Santiago de Compostela, 4 de novembro de 2024

O presidente da Xunta, Alfonso Rueda, anunciou que o Consello deu hoxe o visto e prace a “Estratexia da Economía Azul de Galicia, que mobilizará máis de 114 millóns de euros ata 2027”. Será a folla de ruta coa que o Goberno autonómico busca situar Galicia coma referente neste eido para “compaxinar a protección do medio mariño e a actividade económica”.

A nova Estratexia é un documento fundamental dada a estreita vinculación da comunidade co mar e o seu potencial económico ligado aos recursos mariños. Galicia “que é a comunidade con máis quilómetros de costa”, salientou Rueda, conta con importantes portos e unha forte tradición pesqueira que sustentan unha parte importante da economía do territorio. A finalidade da estratexia e dar resposta a retos como o Cambio Climático, a sobreexplotación dos recursos acuáticos e a necesidade de diversificar o tecido produtivo combinando sustentabilidade e crecemento económico.

A estratexia foi elaborada mediante un proceso vivo e participativo no que se constituíron 11 grupos de traballo compostos por representantes das actividades da economía azul da comunidade. Así, celebráronse 11 obradoiros sectoriais con 123 participantes que permitiron validar a diagnose da EAG e identificar os retos estratéxicos. Ademais, celebráronse dúas xornadas multisectoriais que contaron con 76 participantes para consensuar o conxunto de medidas que recollidas no documento.   O resultado foron 40 medidas que en conxunto suporán a mobilización de máis de 114 millóns de euros.

Entre os obxectivos está situar os sectores emerxentes vencellados a este ámbito como referentes internacionais e garantir a sustentabilidade e circularidade da pesca, o marisqueo e a acuicultura como actividades nucleares. Tamén persegue integrar as diferentes actividades que conforman a economía azul mediante conectores de innovación reforzando a gobernanza, fomentando a I+D+i azul e impulsando o desenvolvemento e retención do talento especializado. “Unha terra mariñeira como Galicia ten que ser punteira nun sector emerxente a nivel internacional como é a economía azul”, indicou Rueda.

A estratexia promovida polo Goberno galego vertebra as medidas entorno a 6 eixos: a cooperación intersectorial, os conectores de innovación, a competitividade, o patrimonio mariño, o traballo e talento así como a información e comunicación. Entre as accións recollidas están a creación dunha rede que integre aos diferentes axentes da economía azul de Galicia, o fomento de sinerxías entre os sectores da biotecnoloxía e da acuicultura, un catálogo galego de I+D+i azul, a creación dun centro de biotecnoloxía azul en rede ou a creación dunha unidade  especializada neste ámbito na oficina Galicia Empresa.

O documento constitúe a auténtica folla de ruta da Xunta para protexer e restaurar os  ecosistemas mariños e aproveitar dun xeito innovador os recursos acuáticos garantindo o desenvolvemento económico a longo prazo. Ademais, e de xeito paralelo, servirá para proporcionar unha mellor calidade de vida á sociedade galega a través da produción sostible de alimentos, a posta en valor da cultura mariñeira do emprego de calidade e do transporte sostible.