Palas de Rei (Lugo), 5 de decembro de 2024

O delegado territorial da Xunta, Javier Arias, participou esta mañá na clausura do Programa Integrado de Emprego de Palas de Rei, compartido cos concellos de Monterroso, Portomarín, Antas de Ulla, O Páramo, Guntín e Melide.

A iniciativa, cunha duración de 12 meses, permitiu mellorar a cualificación de 100 persoas desempregadas co obxectivo de abrirlles as portas ao mundo laboral. Nese sentido, máis do 50% dos participantes neste PIE conseguiron xa un posto de traballo.

O delegado territorial anunciou que para o período 2024-2025 xa está aprobado un novo Programa Integrado de Emprego para Palas de Rei e os seis mesmos concellos. A Consellería de Emprego, Comercio e Emigración financiará novamente a acción con 220.000 euros.

Arias destacou a ampla dimensión dos contidos que se abordan nestes programas. Así, apuntou que imparten formación en ámbitos relacionados con sectores empresariais que teñen implantación no territorio; xunto con cualificación transversal en novas tecnoloxías, técnicas de busca de emprego e realización de entrevistas, habilidades sociais, intelixencia emocional ou fomento do emprendemento.

Así mesmo, procúrase facilitar o contacto entre traballadores e empresas e inclúese unha parte de prácticas en firmas vinculadas coa formación que se ofrece no programa integrado.