Val do Dubra (A Coruña), 12  de decembro de 2024

A delegada da Xunta, Belén do Campo, visitou hoxe  a Casa de Cultura de Val do Dubra para coñecer a actuación de mellora da eficiencia enerxética do edificio que se vai levar a cabo cunha axuda de máis de 114.000 euros ao abeiro da  convocatoria de axudas plurianual destinada a impulsar a eficiencia enerxética nas infraestruturas vinculadas á prestación de servizos municipais, que contou cun orzamento de 5,3 millóns de euros para toda Galicia cofinanciados con fondos Feder para o período 2024-2025.

A representante do Goberno autonómico destacou que un total de 8 concellos da comarca de Santiago recibiron achegas do Goberno galego desta liña por un importe que supera os 875.000 euros.

Estas axudas van dirixidas a concellos de menos de 30.000 habitantes e permiten cubrir ata o 80 % dos gastos de melloras en illamento, iluminación interior e climatización cun límite de 120.000 euros.

Así, fináncianse obras de mellora das envolventes térmicas, illamentos en cubertas e fachadas, e a instalación de carpinterías exteriores ou acristalamentos con boas características térmicas. Tamén son subvencionables as obras para contar con iluminación eficiente no interior dos edificios, así como para a colocación de sistemas de control e regulación da iluminación artificial, da intensidade e o acendido.

Outra das melloras contempladas nesta orde son á climatización e calefacción, que podían incluír fontes de enerxía renovable. O importe da actuación tiña que oscilar entre os 60.000 e os 150.000 euros.  As administracións locais beneficiadas tiveron que  acreditar unha redución mínima inicial do 20 % do consumo anual de enerxía primaria non renovable e de nas emisións de gases de efecto invernadoiro.

Belén do Campo explicou que o obxectivo destas axudas “é contribuír á redución das emisións de gases de efecto invernadoiro e á mitigación dos efectos do cambio climático, en liña coa Estratexia de cambio climático e enerxía 2050 e no marco do Programa Feder Galicia 2021-2027”. Búscase tamén facilitarlles aos concellos galegos o aforro enerxético e económico, así como a mellora ambiental e do confort do persoal e da cidadanía usuaria dos servizos municipais. A través da medida impúlsase ademais a reactivación económica dos sectores implicados nas obras e refórzase o efecto exemplarizante das actuacións da Administración.