As Neves (Pontevedra), 27 de decembro de 2024

O delegado territorial da Xunta en Pontevedra, Agustín Reguera, visitou esta mañá o concello das Neves, que acaba de adquirir un novo vehículo para a protección do ambiente e do espazo natural grazas ao Fondo de Compensación Ambiental (FCA).

En total, o concello contou cunha achega de 32.500 euros que permitiu a adquisición dunha retroexcavadora mixta de segunda man coa que esperan axilizar e perfeccionar as labores de limpeza e coidado do medio. Neste sentido, Reguera destacou a “boa decisión tomada polo concello, tendo en conta que As Neves é un concello especialmente vulnerable aos incendios”.

Esta liña de axudas contou cun orzamento de máis de 475.000 euros na área territorial de Pontevedra, dos que se beneficiaron 15 concellos.

O delegado territorial aproveitou a visita para lembrar a importancia de “seguir substituíndo as frotas municipais para conseguir unhas institucións máis respectuosas co medio ambiente”.

Cabe destacar que, dende o ano 2010, o concello das Neves recibiu achegas por valor de preto de 675.000 euros a través deste Fondo de Compensación Ambiental.

FCA

O FCA foi creado para distribuír o canon eólico en beneficio da conservación e restauración da contorna, así como do reequilibrio territorial. As accións subvencionables inclúen os investimentos e custos de funcionamento dos servizos municipais dedicados á protección do medio.

Entre os obxectivos que deben perseguir figuran a conservación da biodiversidade, o fomento do coñecemento e da utilización recreativa e didáctica dos recursos naturais, e a recuperación do medio natural degradado ou contaminado. Tamén deben impulsar a eficiencia e o uso sustentable das enerxías renovables, e, en xeral a protección do medio natural.