Santiago, 19 de febreiro de 2025

O secretario xeral para o Deporte, José Ramón Lete Lasa, participou esta mañá na presentación dos Campionatos Galegos Universitarios de 2025 que contarán coa participación de 600 mozos e mozas universitarios e universitarias en nove especialidades deportivas nas categorías masculina, feminina e mixta.

Nas súas verbas, o mandatario galego destacou a importancia de que “o deporte e a actividade física estean presentes no desenvolvemento persoal, físico e intelectual, de todo cidadán”. Neste sentido, apuntou cara á unión da universidade como “epicentro da formación e avance da comunidade e o deporte, elemento esencial de sociedades activas e saudables” como un “binomio imbatible no que todos debemos ir da man”.

Deste xeito, o responsable do Deporte Galego apuntou as tarefas nas que a Xunta seguirá traballando de cara a mellorar o ámbito deportivo na universidade como “a harmonía entre as horas de estudo académico e a práctica deportiva, a mellora das instalacións deportivas ou o réxime de beneficios dos universitarios galegos deportistas de alto nivel”.

Lete Lasa sinalou a aposta pola vida activa nas idades máis temperás como demostra o Programa Xogade no que o Goberno galego axunta toda a actividade deportiva escolar e federada para os rapaces e rapazas entre 6 e 16 anos e que xa chega a preto de 150.000 mutualizados, cuxo seguro deportivo está sufragado pola Xunta.