Lugo, 24 de febreiro de 2025

A Xunta destina 220.000 euros ao novo Programa Integrado de Emprego que desenvolve a Asociación Provincial de Empresarios de Hostalería e Turismo (Apehl) en Lugo e Monforte de Lemos.

O delegado territorial, Javier Arias, acompañado do presidente da entidade, Cheché Real, visitou hoxe unha das accións realizadas no marco desta iniciativa, que ofrece a 100 persoas desempregadas a oportunidade de mellorar a súa capacitación para traballar nun ramo con alta demanda de profesionais cualificados.

O programa prolongarase ata o mes de outubro e combina formación propia do sector con accións de orientación e asesoramento noutras materias.

As actividades específicas inclúen cursos de auxiliar de cociña, axudante de camareiro,  manipulador de alimentos ou nocións de inglés básico para hostalería, entre outras. Tamén se promoven obradoiros de entrevistas e actividades orientadas a mellorar as habilidades sociolaborais, a fomentar o emprendemento ou a favorecer o manexo das novas tecnoloxías. Ademais, prevese a realización de prácticas profesionais non laborais en empresas.

Arias destacou a utilidade destas accións, que parten dun obxectivo mínimo de inserción laboral do 45% do alumnado. “Os participantes non só melloran a súa cualificación senón que tamén entran en contacto co mercado de traballo, que moitas veces é o máis difícil para as persoas que buscan unha oportunidade laboral”, dixo.

Tamén subliñou que os Programas Integrados de Emprego enmárcanse no reto da Xunta de “axustar as accións formativas aos perfís que demanda o tecido produtivo” e contribuír así “a cubrir as vacantes que existen”.