Santiago de Compostela, 13 de marzo de 2025

A Consellería de Medio Ambiente e Cambio Climático ordenou hoxe a suspensión dunha parte da actividade do Centro de Tratamento de Residuos Industriais de Galicia (CTRIG), localizado no municipio das Somozas, como medida cautelar e preventiva ante a detección de varios casos de intoxicación na contorna.

A decisión adóptase despois de que nas últimas horas se recibiran a través do 112 varios avisos de centros sanitarios da comarca advertindo da existencia de pacientes que referían diferente sintomatoloxía de carácter leve, como dores de cabeza e molestias oculares, entre outras.

A raíz destas comunicacións, decidiuse enviar esta mañá a tres inspectores do Servizo de Intervención Ambiental —dependente da Dirección Xeral de Calidade Ambiental e Sostibilidade— a visitar as instalacións do CTRIG. Como consecuencia desta inspección, que polo momento non é concluínte, acordouse suspender cautelarmente a actividade nun dos focos de emisión do devandito centro.

A decisión foi comunicada xa á Sociedade Galega de Residuos Industriais SA (Sogarisa), xestora da instalación, e a partir deste momento abrirase un período de 15 días por parte do Servizo de Intervención Ambiental para recompilar toda a información que se considere necesaria no marco da investigación aberta e resolver o expediente.

A maiores solicitáronse oficialmente a Sogarisa unha serie de datos e información sobre a actividade deste centro nas últimas 48 horas e, en paralelo, a Dirección Xeral de Calidade Ambiental e Cambio Climático está a realizar xa na zona distintas medicións sobre a calidade do aire.

Con todas as mostras e evidencias recompiladas e en función do resultado das inspeccións e da propia investigación sobre a posible orixe do foco de intoxicacións, a Consellería de Ambiente e Cambio Climático adoptará as medidas necesarias en aplicación da Lei de control e prevención integrados da contaminación (IPPC).