Ourense, 14 de marzo de 2025

O conselleiro de Sanidade, Antonio Gómez Caamaño, salientou hoxe o incremento da atención á dor no Servizo Galego de Saúde, cun 40 % máis de consultas especializadas nos últimos catro anos.

O titular da carteira sanitaria do Executivo galego, acompañado do xerente da área Sanitaria de Ourense, Verín e O Barco de Valdeorras, Santiago Camba, interveu na inauguración da Reunión do grupo de traballo da dor oncolóxica: avanzando no enfoque integral do paciente con dor pélvica oncolóxica, que organiza a Sociedade Española da Dor.

Neste foro, Gómez Caamaño remarcou a actividade das unidades da dor, que tratan a dor de maneira efectiva e ofrecen un apoio incondicional aos pacientes.  En concreto, no pasado ano, estas unidades chegaron a realizar máis de 44.000 consultas, superando amplamente as 31.000 feitas no ano 2020, aumento que, segundo o conselleiro, evidencia a crecente demanda deste servizo e a necesidade de seguir investindo tempo e recursos nel.

Na súa intervención, o conselleiro Incidiu en que o Servizo Galego de Saúde manifestou a vontade de reforzar os recursos e as accións destinadas ao tratamento e manexo integral da dor, de acordo co establecido na Estratexia de calidade e seguridade do paciente, documento elaborado por profesionais das sete áreas sanitarias e dirixido a humanizar o tratamento e a atención.

O máximo responsable da saúde da cidadanía galega tamén puxo en valor o papel dos comités da dor, que coordinan a actividade asistencial en todos os niveis e garanten un enfoque integral.

Así mesmo, subliñou a importancia de contar con ferramentas tecnolóxicas como a plataforma TELEA, que posibilita monitorizar a dor crónica e facer un seguimento máis personalizado e continuado dos pacientes, sobre todo dos oncolóxicos que teñen un maior risco asociado á medicación.

O conselleiro remarcou que a Unidade de Dor do Complexo Hospitalario Universitario de Ourense foi a primeira de España en acadar, no ano 2022, a acreditación da dor oncolóxica que concede a Sociedade Española de Calidade Asistencial.

Tamén destacou o papel fundamental que desenvolve a Sociedade Española da Dor, promovendo a investigación, a formación e a divulgación.

Finalmente, Gómez Caamaño agradeceu o traballo de todos os profesionais que están comprometidos coa saúde da cidadanía e que apostan por un sistema que sitúa o paciente no centro do sistema.