Pontevedra, 19 de marzo de 2025

O delegado territorial da Xunta en Pontevedra, Agustín Reguera, visitou esta mañá o CEIP A Xunqueira 1, en Pontevedra, onde comprobou a satisfacción do alumnado e do corpo docente co novo ascensor instalado e  que está en funcionamento dende finais do pasado ano 2024.

Trátase dun mecanismo que pretende eliminar as barreiras arquitectónicas e mellorar autonomía do alumnado con problemas de mobilidade. A instalación deste ascensor foi posible grazas a un investimento da Xunta de preto de 180.000 euros. Ademais, instalouse unha rampla accesible.

Reguera destacou a importancia de manter “un sistema educativo accesible para todos os nenos e nenas” e o compromiso da Xunta por “seguir eliminando calquera traba que dificulte o acceso á educación nas mellores condicións, para que o alumnado galego poida gozar dunha educación accesible que garanta a igualdade de oportunidades”.

Acompañado polo director territorial de Educación, César Pérez, e polo equipo directivo do centro, o delegado tamén aproveitou para visitar a aula de educación sensorial, que foi posible grazas a un investimento de preto de 8.000 euros e da que xa gozan varios alumnos e alumnas do centro.

Cabe destacar que, dende o ano 2009, a Xunta investiu máis de 300.000 euros en grandes obras no CEIP A Xunqueira 1.

Plan de nova arquitectura pedagóxica

Este ano arrancou a segunda fase do Plan de Nova Arquitectura Pedagóxica que se levará a cabo durante os próximos tres anos e que prevé a execución de 61 grandes actuacións en centros educativos da provincia de Pontevedra por valor de preto de 65 millóns de euros.

O Plan de Nova Arquitectura Pedagóxica, que arrancou no ano 2021, rematará no ano 2028 cun investimento total en toda Galicia de preto de 500 millóns de euros que serán destinados á renovación de edificios educativos en toda a comunidade autónoma.