Santiago de Compostela, 27 de marzo de 2025

A conselleira de Medio Ambiente e Cambio Climático, Ángeles Vázquez, e o alcalde de Muíños, Plácido Álvarez, avaliaron hoxe varios proxectos municipais en materia de augas e patrimonio natural.

Así, durante o encontro o alcalde trasladou á conselleira a necesidade tanto de construír dous novos depósitos de auga potable en Pazó e Picós como de cambiar a tubaxe desde a captación ao depósito en Couso de Salas.

En materia de saneamento, a conselleira e o rexedor abordaron o interese municipal en mellorar as redes de tratamento de augas e de pluviais desde a zona de Tourós ata a estación depuradora de augas residuais (EDAR) da localidade.

A conselleira explicoulle ao rexedor que os técnicos de Augas de Galicia estudarán estas iniciativas de cara a establecer vías de colaboración para acometelas, tanto desde o punto de vista técnico como de financiamento.

Nesa liña, a conselleira reiterou que a Xunta continuará prestando o seu apoio técnico e económico aos concellos para que poidan exercer as súas competencias de saneamento e abastecemento de xeito máis eficiente e prestar servizos de calidade á súa veciñanza.

De feito, o orzamento de Augas de Galicia sobe este ano 2025 preto dun 5%, ata os 144 millóns de euros, para seguir optimizando o saneamento e o abastecemento coa mellora de infraestruturas, a formación e divulgación e a execución de políticas activas de resposta ao cambio climático.

A maiores, no encontro a conselleira e o alcalde analizaron os proxectos municipais para desenvolver varias sendas na localidade coas que poñer en valor o patrimonio natural da zona. Neste eido acordaron colaborar para a realización de actuacións de mellora na senda do Parque Forestal Outeiro da Cela.