O Consello da Xunta deulle hoxe o visto e prace ao contrato para implementar o desenvolvemento e actualización da plataforma de integración dos sistemas de comunicación en tempo real do Servizo Galego de Saúde, Cetir. O Executivo galego investirá 390.297 euros co fin de optimizar e de dotar de novas funcionalidades o sistema.

Cetir é unha plataforma de comunicación en tempo real que xera canles de voz e vídeo instantáneos sobre a base de diferentes estándares. Permite conectar calquera aplicativo empregado por parte dos profesionais sanitarios, como pode ser a historia clínica electrónica Ianus 5, con aquelas aplicacións que son empregadas pola cidadanía, como o Sergas Móbil.

Esta plataforma garante e asegura todas as operacións que se realicen en rede, ademais de posibilitar a trazabilidade de todos os eventos comunicativos que se rexistren na mesma.

A actualización de todos os servizos da plataforma estará completa en decembro de 2026.Na actualidade, os continuos avances tecnolóxicos exixen o desenvolvemento da plataforma Cetir para adaptarse ás novas necesidades da sociedade e, por ende, do Servizo Galego de Saúde.

Entre as funcionalidades que posibilitará a actualización da plataforma Cetir atópanse: a de permitir gravar as chamadas -de vídeo e voz- de acordo á normativa e aos estándares de seguridade vixentes; converter os postos de traballo en teléfonos virtuais; dotar a aplicación Sergas Móbil dunha comunicación de voz dixital que identifique de xeito inequívoco aos cidadáns -sen necesidade de que acheguen o seu número de teléfono-; catalogar sistemas de videoconferencia adicionais para usos concretos ou posibilitar o envío de notificacións ás aplicacións dos teléfonos móbiles e postos de traballo, aínda que non se estean empregando estes programas.

A Xunta de Galicia segue a dotar o Servizo Galego de Saúde de ferramentas de comunicación que permiten complementar as súas actuacións de tipo presencial (citas, consultas, etc...).

Así, coa optimización das súas canles de comunicación, mellora e axiliza o actual modelo de asistencia sanitaria, tanto desde a perspectiva dos usuarios da rede sanitaria pública, como desde o punto de vista dos seus profesionais.