Santiago de Compostela, 8 de abril de 2025

MeteoGalicia recibiu desde 2006 máis de 30.000 escolares aos que mostrou o labor que realizan a diario os seus técnicos e a importancia que ten o estudo dos fenómenos meteorolóxicos e climáticos na comunidade para cuestións como a xestión das emerxencias ou o desenvolvemento de actividades económicas como a agricultura, a pesca ou o turismo. Un fito que destacou a conselleira de Medio Ambiente e Cambio Climático, Ángeles Vázquez, durante a súa visita á sede do organismo autonómico acompañando ao alumnado do CEIP Pío XII.

A responsable autonómica incidiu en que este tipo de actividades formativas están adscritas ao programa Mocidade polo Clima e, máis en concreto, á iniciativa MeteoEscolas, desenvolvida ao abeiro do Plan Proxecta da Consellería de Educación, Ciencia, Universidades e Formación Profesional. O fin último é ampliar os coñecementos do estudantado sobre cuestións relacionadas coa meteoroloxía e o clima e promover a investigación na escola mediante a observación directa do tempo e realizando actividades en distintas áreas educativas.

Neste sentido, lembrou a conselleira, ademais de ver como traballan os distintos departamentos de MeteoGalicia, os escolares realizan no seu centro educativo prácticas como a toma de datos de precipitacións ou das temperaturas máximas e mínimas permitíndolles avaliar a súa situación particular da súa área de residencia en relación con outras zonas da contorna ou do conxunto de Galicia. Ao mesmo tempo, poden comparalas cos datos históricos que ofrece o organismo dependente da Consellería de Medio Ambiente e Cambio Climático na súa páxina web.

MeteoGalicia imparte na actualidade tres tipos de sesións formativas -tanto aos centros educativos como ao público en xeral- en función dos coñecementos divulgados. A primeira delas, impartida polo persoal da área de Calidade do Aire, está dirixida a escolares de 3º de Primaria ou cursos superiores e centrada na contaminación atmosférica, polo que inclúe tamén unha visita á estación de calidade do aire.

A segunda corre a cargo do persoal das áreas de Predición Operativa e Climatoloxía e Observación e está pensada para o estudantado de 5º de Primaria ou niveis superiores pois imparte nocións sobre meteoroloxía e de distintos aparellos meteorolóxicos, formación que se completa os martes co lanzamento dunha radiosondaxe. Mentres, a terceira, que corresponde aos técnicos da área de Ruído, ten como destinatarios os estudantes de 2º de Bacharelato, Formación Profesional ou das universidades e céntrase en formar sobre o que é o ruído ambiental, como se mide e o seu impacto.

A visita á que asistiu a conselleira acompañando a 25 alumnas e alumnos de 5º de Primaria do CEIP Pío XII correspóndese co segundo tipo, coa difusión de distintos coñecementos sobre a meteoroloxía e o funcionamento de dispositivos de toma de datos como pluviómetros, termómetros ou mesmo a radiosondaxe, entre outros. De feito, ao final da visita procedeuse á solta dese dispositivo para a toma de datos de distintos parámetros atmosféricos.

Nesta liña, a titular de Medio Ambiente e Cambio Climático subliñou que neste curso 2024-2025 está previsto que visiten MeteoGalicia preto de 3.750 escolares de toda Galicia e puxo en valor que se trata de accións formativas moi valoradas polo alumnado pois nas enquisas que cobren os participantes adoitan outorgar unha nota de máis de 4,9 puntos, cando a puntuación máxima é de 5.

Balance climatolóxico de marzo e do inverno

Ángeles Vázquez aproveitou para expoñer os resultados dos últimos informes climatolóxicos elaborados por MeteoGalicia, os do mes de marzo e do pasado inverno. Neste sentido, incidiu en que o mes pasado foi un mes lixeiramente frío en relación coa media histórica -que se remonta a 1961- cunha temperatura de 10,6 graos centígrados, tres décimas por debaixo desa media, co que se trata dun dato que se desvía da tendencia actual de rexistrar cada vez meses máis cálidos como consecuencia do cambio climático. Mentres, o volume de precipitacións estivo exactamente na media histórica para este mes, con 98 litros por metro cadrado.

En canto ao inverno climatolóxico 2024-2025 (decembro, xaneiro e febreiro), a conselleira lembrou que foi o sétimo máis cálido da serie cunha temperatura de 9,8 graos centígrados, 1,3 graos máis que os valores habituais nesta época do ano. De feito, os tres meses deste período rexistraron valores medios superiores aos datos normais: decembro foi cálido, cunha temperatura de 9,5 graos (0,8 graos máis do habitual), febreiro foi moi cálido, cunha media de 10,2 graos (1,5 graos máis que os rexistros normais), e xaneiro foi extremadamente cálido ao acadar os 9,8 graos (1,8 graos por enriba da media), converténdose no terceiro xaneiro máis cálido da serie histórica.

En canto ás precipitacións, o pasado inverno climatolóxico foi lixeiramente húmido cunha media de 521 litros por metro cadrado, o que representa unha porcentaxe de choivas un 17% superior ao que é habitual neste período do ano. Por meses, decembro foi un mes moi seco, cunha precipitación media de 78 litros por metro cadrado, un 60% menos do habitual; xaneiro foi extremadamente húmido, un 125% máis do normal ao rexistrarse 324 litros por metro cadrado, o que o converte no cuarto xaneiro máis húmido da serie histórica; e febreiro foi un mes normal, cunha media de 118 litros por metro cadrado, unhas choivas un 2% superiores á media.