O Servizo Galego de Saúde licita o mantemento e evolución dos sistemas de información hospitalaria por un importe de 1,4 millóns de euros
O contrato abrangue o desenvolvemento de programas informáticos destinados á xestión das consultas hospitalarias, aos procesos de seguimento de pacientes, á actividade cirúrxica ou ao arquivo de historias clínicas
Inclúe, ademais, o mantemento de aplicacións informáticas destinadas á xestión sanitaria, como poden ser o control do gasto, o rexistro de profesionais, a xestión de quendas e contratos de traballo ou a xeración das nóminas
As empresas interesadas en participar neste procedemento teñen de prazo ata o vindeiro 26 de maio para presentar as súas ofertas
Santiago de Compostela, 24 de abril de 2025
O Portal de Contratos Públicos de Galicia publica na súa web a licitación, por importe de 1.427.969 euros, dos servizos de desenvolvemento e evolución do Sistema de Información Hospitalario de Galicia (SIHGA) e outras aplicacións informáticas do ámbito clínico e de xestión.
No que atinxe á área clínica, o contrato inclúe o desenvolvemento de aplicacións informáticas vinculadas á xestión das consultas de urxencias hospitalarias, aos procesos de seguimento especial de pacientes, á atención nas consultas externas, á actividade cirúrxica ou o arquivo de historias clínicas e rexistro de instrucións previas, entre outras.
Así mesmo, inclúe o mantemento de aplicacións informáticas destinadas á xestión sanitaria, como poden ser o control do gasto, o rexistro de profesionais, a xestión de quendas e contratos de traballo ou a xeración das nóminas.
As empresas interesadas en participar neste procedemento teñen de prazo ata o vindeiro 26 de maio para presentar as súas ofertas.
