Santiago de Compostela, 2 de maio de 2025

A Xunta de Galicia publica hoxe no Portal de Contratos Públicos a licitación, por importe de 9.224.630 euros, do subministro sucesivo do material necesario para a realización de determinacións de tipo bioquímico e inmunoquímico nos laboratorios da área sanitaria da Coruña e Cee.

A duración inicial do contrato será de dous anos e incluirá o subministro de todos aqueles reactivos e analizadores precisos para medir os parámetros bioquímicos e inmunoquímicos do conxunto de probas que se realicen nos laboratorios do Hospital Teresa Herrera da Coruña e do Hospital Virxe da Xunqueira de Cee.

Os laboratorios do Hospital Teresa Herrera realizan máis de 12 millóns de determinacións ao ano, mentres que os laboratorios do Hospital Público de Cee rexistran ao redor de 700.000 destas probas de laboratorio ao ano.

As determinacións de laboratorio son un tipo de análises biolóxicas que teñen como obxectivo detectar ou diagnosticar enfermidades tras a identificación dos compoñentes químicos e dos procesos fisiolóxicos.

Os pregos deste expediente inclúen tamén a dotación de todo equipamento e software necesario para realizar as ditas análises, entre os que se inclúen: alicuotadores, centrífugas, neveiras e todo aquel material funxible que sexa necesario para analizar as mostras.

As empresas interesadas en participar neste procedemento teñen de prazo ata o vindeiro 4 de xuño para remitir as súas ofertas.