Santiago de Compostela, 14 de maio de 2025

O conselleiro de Sanidade, Antonio Gómez Caamaño, agradeceu a xenerosidade e a implicación da sociedade galega, que permitiu acadar as 105.378 doazóns de sangue o ano pasado, o que supón 1.853 máis que no 2023, representando un incremento de preto dun 2 %.

O titular da carteira sanitaria do Executivo galego, acompañado da directora da Axencia Galega de Doazón de Órganos e Sangue (ADOS), Marisa López, presentou o balance de doazón de sangue do pasado ano.

Tal e como detallou o conselleiro, o incremento producido nas doazóns de sangue permite elevar un punto máis a taxa global galega, pasando de 38 a 39 doazóns por cada 1.000 habitantes e ano, situando á nosa comunidade entre as que contan cun nivel máis alto de participación en todo o Estado, manténdose ao redor dos tres puntos por riba da media nacional.

Outro dato moi positivo destacado polo conselleiro é o feito de que o pasado ano 8.931 persoas doaron sangue por primeira vez, o que reflicte a crecente confianza da cidadanía no sistema e o firme compromiso das novas xeracións.

Xunto ao anterior, a campaña universitaria na que participan os sete campus galegos tamén presenta un bo balance, acadándose 1.348 doadores, o que permite asegurar o relevo xeracional que resulta fundamental para cubrir as necesidades de sangue diarias dos hospitais do Servizo Galego de Saúde e dar continuidade a un sistema de doazón do que o conselleiro amosouse orgulloso.

Gómez Caamaño puxo en valor o labor dos profesionais que integran os equipos de hemodoazón da Axencia Galega de Doazón de Órganos e Sangue, máis de cen, así como ás entidades que contribúen a conseguir estas boas cifras, como son os concellos, as universidades, as empresas, a Federación Galega de Irmandades de Doadores de Sangue, así como ás 73.421 persoas que doaron o seu sangue que, co seu xesto, contribúen a salvar vidas.

O conselleiro animou a toda a sociedade galega a seguir por este camiño de solidariedade, de xenerosidade e de compromiso coa sanidade pública galega.

Nivel de participación e estándares de calidade

Na súa intervención na rolda de prensa, a directora da Axencia Galega de Doazón de Órganos e Sangue, Marisa López, detallou polo miúdo as cifras de doazón, referindo, entre outros datos, o número e as taxas de doazóns de xeito provincializado.

A directora de ADOS incidiu en que, durante o pasado ano, as sete principais cidades galegas concentraron preto do 44 % das doazóns de sangue, cun total de 45.968 achegas, o que representa unha taxa media de 46 doazóns por cada mil habitantes e ano. Neste sentido, destacou especialmente á cidade de Santiago de Compostela que, un ano máis, acadou a maior taxa, con 85 doazóns por cada mil habitantes, seguida de Pontevedra (55/1000) e de Ferrol (47/1000).

En canto ao número total de doazóns, Vigo foi a cidade con maior número, alcanzando as 12.257.

Á marxe das grandes cidades, entre os concellos cun maior índice de participación destaca o municipio coruñés de Padrón, con 86 doazóns por cada 1000 habitantes e ano.

Na provincia de Lugo, Meira foi o concello coa maior taxa, 79/1000 habitantes e ano. Na provincia de Ourense, o máis alto nivel de participación rexistrouse na Pobra de Trives, que acadou  a taxa de 64/1000 habitantes e ano; mentres que na de Pontevedra foi O Rosal, cunha taxa de 69/1000 habitantes e ano.

Marisa López tamén puxo en valor que a Axencia de Doazón de Órganos e Sangue conta cos máis altos estándares de calidade que se poden obter no ámbito sanitario pois, na actualidade, dispón da máxima certificación de calidade ISO 9001:2015, así como as acreditacións de calidade outorgadas polo Comité de Acreditacións da Transfusión (CAT) e a European Federation for Immunogenetics (EFI).