Santiago de Compostela, 29 de maio de 2025

O programa educativo O Parque Nacional coa Escola contou este curso 2024-2025 coa participación de preto de 2.300 persoas entre alumnado e profesorado dos catro concellos -Bueu, Cangas, Ribeira e Vigo- da área de influencia do Parque Nacional marítimo-terrestre das Illas Atlánticas de Galicia. Os escolares -dun total de 124 aulas de 29 centros educativos- tiveron a oportunidade de achegarse aos valores e a riqueza medioambiental dos catro arquipélagos que conforman este espazo natural: Cíes, Ons, Sálvora e Cortegada.

Entre as actividades desenvolvidas ao abeiro desta acción formativa -que vai desde outubro ata abril-, o Parque Nacional convidou ás escolas e grupos inscritos a participar nun concurso para reflectir o aprendido durante as distintas accións. Con esta iniciativa buscábase afondar no coñecemento das paisaxes e seres vivos presentes nas illas, implicar ao alumnado na conservación da súa contorna máis próxima e promover a participación da cativada en procesos creativos compartidos.

As aulas que se anotaron puideron optar entre distintas opcións en función da idade das alumnas e alumnos: un móbil colgante para as aulas de Infantil e de 1º de Primaria, un traballo manual (como unha maqueta ou un mural) relacionado coa conservación das illas para 2º e 3º de Primaria e o deseño dun xogo de mesa (non dixital) sobre os distintos arquipélagos para os cursos de 4º, 5º e 6º de Primaria.

Os traballos presentados reflicten unha gran creatividade, interese polos contidos e dedicación das nenas e nenos participantes pois houbo propostas moi variadas como maquetas das illas, proxectos de escape room, murais creativos e xogos de mesa de cartas ou con taboleiro. De feito, as creacións das aulas participantes están expostas ata o vindeiro 30 de xuño no Centro de Visitantes do Parque Nacional en Vigo en horario de 10,00 a 14,00 e de 16,30 a 20,00 horas.

As 14 aulas gañadoras ou con mencións especiais na edición deste curso corresponderon aos seguintes centros educativos, os catro de Vigo: o CEP Dr. Fleming (os cursos 3ºA, 3ºB, 3ºC, 3ºD, 6ºB, 6ºC e 6ºD), o CEIP Vicente Risco (os cursos de Infantil), o CEIP O Pombal (1ºA, 1ºB, 6ºA e 6ºB) e o CEIP A Doblada (5ºA e 5ºB).

O premio aos traballos galardoados consistiu nunha ruta especial co equipo de guías do Parque Nacional na que, a través dos contidos estudados no programa, a cativada puido desfrutar dunha xornada nas illas. Neste caso, o arquipélago elixido polos centros educativos para realizar as visitas -feitas xa durante este mes- foi Cíes.