Ferrol, 29 de maio de 2025

A delegada territorial da Xunta en Ferrol, Martina Aneiros, participou esta mañá na presentación da I Regata Cidade de Ferrol de vela que terá lugar esta fin de semana en augas da ría ferrolá co apoio da Xunta de Galicia.

A cita, organizada polo Club de Mar Ferrol e incluída no calendario oficial da Federación Galega de Vela, disputarase na modalidade de vela cruceiro en dúas etapas: o sábado e domingo. Ata o de agora hai 24 barcos rexistrados aínda que se estima que podan chegar á trintena xa que o prazo de inscrición non remata ata mañá.

Na súa intervención, a delegada territorial destacou a oportunidade que eventos coma este supoñen para poñer en valor o potencial náutico, deportivo e turístico da zona “xa que non só achegará deporte de alto nivel, senón que tamén servirá para dinamizar a cidade, atraer visitantes e consolidar a imaxe de Ferrol como un destino de referencia no ámbito turístico e dos deportes náuticos”, sinalou.

Ademais da competición náutica, o evento estará amenizado con pinchos, música e agasallos que terán lugar na Sala Curuxeiras ao finalizar cada unha das xornadas.