Santiago de Compostela, 1 de xuño de 2025

O Portal de Contratos Públicos de Galicia vén de publicar a licitación,  por un importe de 2.942.841 euros, do servizo de mantemento dos elevadores, portas automáticas e motorizadas e das escaleiras mecánicas dos centros dependentes do Servizo Galego de Saúde.

O contrato abrangue o mantemento de 1.573 equipos das sete áreas sanitarias, tendo como obxectivo principal o seu mantemento, en termos de funcionamento e seguridade.

Dun xeito desagregado, dos máis de 1.500 equipos que inclúe o expediente, 520 son ascensores, 20 escaleiras mecánicas, 26 montacargas, 987 portas automáticas e 20 portas motorizadas.

O contrato terá unha duración inicial de tres anos e prevé a posibilidade de prórroga por un máximo de dous anos máis.

Trátase da segunda contratación centralizada que se fai para o mantemento destes equipamentos pois, desde o ano 2020, o mantemento de ascensores e outros equipos semellantes está unificada e centralizada.

Con este expediente tamén se pretende ampliar a cobertura do mantemento de portas automáticas e motorizadas a un servizo integral todo incluído, ao abranguer todos os repostos necesarios, tal e como está configurado o servizo de mantemento en elevadores e escaleiras mecánicas.

As empresas interesadas en participar neste procedemento teñen ata o vindeiro día 27 de xuño para enviar as súas ofertas.