Santiago de Compostela, 10 de xuño de 2025

O conselleiro de Educación, Ciencia, Universidades e Formación Profesional, Román Rodríguez, reuniuse hoxe co presidente da Federación Galega de Municipios e Provincias (Fegamp), Alberto Varela, para comezar a traballar na posta en marcha da futura Rede de concellos contra o acoso escolar co fin de previr este tipo de situacións. Esta iniciativa é unha das accións aprobadas no Debate sobre política xeral celebrado en abril no Parlamento de Galicia.

Román Rodríguez, acompañado pola directora xeral de Ordenación e Innovación Educativa, Judith Fernández, destacou que as políticas en prol da boa convivencia nos centros “son unha prioridade” para a Xunta, pero é necesario intensificar o traballo “de xeito coordinado e cooperativo” co resto das administracións e entidades co fin de abordar a loita contra o acoso “desde unha perspectiva integral” na que os concellos “poden xogar un papel moi relevante” na medida en que teñen un contacto máis estreito e directo cos seus cidadáns. Neste senso, gabou a dispoñibilidade do presidente da Fegamp para iniciar un camiño de diálogo conxunto neste eido en beneficio da infancia e a mocidade en particular, e do conxunto do sistema educativo en xeral. 

Cómpre lembrar que o Goberno galego, a través da Estratexia galega de convivencia escolar, dotada con 5,5M€, conta cun marco xeral de loita contra o acoso que se materializa en distintas  iniciativas, como o Plan integral e o protocolo contra o acoso, a posta en marcha dos puntos laranxa en todos os centros educativos, a macroenquisa bianual para testar o estado da convivencia nas aulas ou a formación específica para o profesorado, entre outros. 

Agora, ao abeiro do Plan integral contra o acoso e o ciberacoso escolar, dáse un paso máis coa creación dunha Rede de concellos que se suma a este abano de iniciativas para seguir apostando na boa convivencia.

Poñer o foco na prevención

Así pois, esta rede permitirá articular recursos, compartir boas prácticas e ofrecer un apoio coordinado tanto aos centros educativos como ás familias e ao alumnado, garantindo unha intervención máis rápida e efectiva.

Esta estrutura de apoio territorial non só está pensada para intervir ante situacións de acoso, senón que fai especial fincapé na prevención co fin de garantir o benestar e o desenvolvemento integral do alumnado galego nun clima de convivencia positiva. A súa actuación centrarase en catro eixos principais que son a sensibilización, con campañas para xerar conciencia sobre as consecuencias do acoso; a prevención, promovendo espazos onde o respecto, a inclusión e  a empatía sexan os piares da convivencia diaria; a formación axeitada dos profesionais que traballan cos rapaces para que saiban detectar sinais temperás de acoso, e a denuncia a través de ferramentas áxiles e sinxelas como poden ser os puntos laranxa que xa están nos centros educativos e que se instalarán tamén naqueles concellos que o soliciten.