Padrón (A Coruña), 18 de xuño de 2025

O director da Axencia Galega da Calidade Alimentaria da Consellería do Medio Rural, Martín Alemparte, participou hoxe no pleno do Consello Regulador da Denominación de Orixe Protexida Pemento de Herbón, onde puxo en valor este produto tan recoñecido pola súa calidade dentro e fóra do territorio galego. Ademais, destacou que se levarán a cabo accións de promoción e de información ao consumidor para que poidan recoñecer os auténticos pementos de Herbón.

Neste sentido, cómpre salientar que esta DOP acadou no 2024 unha produción de máis de 72.000 quilos de pemento obtidos a través de 24 produtores inscritos e nove envasadores e almacenistas. Ao mesmo tempo, a DOP Pemento de Herbón conta cunha superficie inscrita de 22 hectáreas para a obtención deste produto de calidade.