Santiago de Compostela, 17 de xullo de 2025

A conselleira de Economía e Industria, María Jesús Lorenzana, mantivo estes días unha xuntanza co presidente da Autoridade Portuaria de Vigo, Carlos Botana, na que se puxo de manifesto a contribución do porto vigués ás capacidades loxísticas de Galicia e ao alto nivel exportador que vén amosando a economía galega que, o pasado ano, superou por primeira vez os 31.000 M€.

Lorenzana destacou a estreita colaboración que veñen mantendo a Xunta de Galicia e a Autoridade Portuaria de Vigo para impulsar o sector loxístico e, con iso, o comercio exterior do tecido empresarial galego, conscientes de que o tráfico marítimo é un dos máis eficientes e reduce a pegada de carbono.

O porto de Vigo ocupa a cuarta posición en España en conexións marítimas internacionais, con enlaces directos a América do Norte e do Sur, África, Asia e o resto de Europa. Isto, engadiu, ofrece unhas grandes oportunidades para as empresas galegas, que poden situar as súas mercadorías en practicamente calquera lugar do mundo desde Vigo, posicionándose globalmente e a prezos altamente competitivos.

Outro dos temas que se tratou na reunión foi a situación da Plataforma Loxística e Industrial de Salvaterra-As Neves (Plisan), da que se acaban de sacar a licitación os instrumentos de ordenación e planeamento da Área Multifuncional Industrial (MI) que permitirá poder dispoñer doutros 1,1 millóns de metros cadrados máis.

Finalmente, Lorenzana tamén puxo en valor a estratexia medioambiental Blue Growth que está a desenvolver a entidade portuaria, para conseguir unhas instalacións enerxeticamente eficientes, innovadoras e conectadas.