Santiago de Compostela, 18 de xullo de 2025

A Xunta de Galicia, por medio da Consellería de Sanidade, publicou no Portal de Contratos Públicos, a licitación do subministro de diverso equipamento con destino ás unidades de rehabilitación do Servizo Galego de Saúde para a mellora da atención sanitaria a doentes con enfermidades raras, incluída a ELA, por un importe de 1.838.958 euros.

Este proxecto enmárcase na Estratexia Galega en Enfermidades Raras 2025-2030 que vén de aprobar o Gobeno galego e conta con fondos do Plan de Recuperación, Transformación e Resiliencia financiado pola Unión Europea.

As empresas interesadas nesta contratación teñen de prazo ata o 4 de agosto para presentar as súas ofertas.

A presente contratación incorpora prestacións innovadoras, incluídas máquinas robotizadas de última xeración, o que garante mellorar a accesibilidade aos recursos e maior efectividade no tratamento rehabilitador destes pacientes. Ao mesmo tempo, mellórase a comodidade para o paciente e o profesional sanitario e humanízase a atención sanitaria.

Con esta licitación, o Goberno galego pretende incorporar aos Servizos de Rehabilitación dos hospitais que dispoñen de Unidades Funcionais Multidisciplinares de Enfermidades Raras (Complexos Hospitalarios Universitarios da Coruña, Santiago de Compostela e de Vigo), o seguinte equipamento: sistema de rehabilitación de marcha robótico; dispositivo de rehabilitación funcional de membro superior mediante electro-estimulación e eléctrodos multicampo; sistema de rehabilitación de equilibrio; equipo adestramento terapéutico de membros inferiores; sistema de ondas mecano-sonoras selectivas; e dispositivo de adestramento neurocognitivo para membros superiores.

Ademais, para garantir a accesibilidade aos recursos e mellorar a comodidade dos pacientes cunha enfermidade rara (incluído ELA), evitando un desprazamento innecesario á hora de recibir un adecuado tratamento rehabilitador, decidiuse a incorporación do sistema de rehabilitación de marcha robótico para os servizos de rehabilitación dos hospitais das catro áreas sanitarias restantes (Complexos Hospitalarios Universitarios de Ferrol, Ourense, e Pontevedra e Hospital Universitario de Lugo.

En definitiva, esta contratación xorde da necesidade de adquirir novos equipamentos tecnolóxicos para os Servizos de Rehabilitación que permitan realizar un tratamento rehabilitador adecuado á situación clínica e que melloren a capacidade funcional das persoas con enfermidades raras (incluída ELA).

Distribución

Tal e como se recolle na licitación, do sistema de rehabilitación de marcha robótico, mércanse sete unidades, destinadas aos Complexos Hospitalarios Universitarios da Coruña, Santiago de Compostela, Vigo, Ourense, Pontevedra, Ferrol e para o Hospital Lucus Augusti.

Do dispositivo de rehabilitación funcional de membro superior mércanse tres unidades, para o Complexo Hospitalario Universitario da Coruña, o de Santiago de Compostela e o de Vigo.

Do sistema de rehabilitación mércanse tamén tres unidades para os centros hospitalarios de Santiago de Compostela, A Coruña e Vigo.

Así mesmo, tamén se mercan tres unidades para os hospitais da Coruña, Santiago de Compostela e Vigo do equipo de adestramento de membros inferiores, do sistema de ondas mecano-sonoras selectivas e do dispositivo de adestramento neurocognitivo para membros superiores.

Estratexia enfermidades raras 2025-2030

Cómpre remarcar que o Executivo galego aprobou recentemente a Estratexia Galega de Enfermidades Raras 2025-2030, na que se van investir 400 millóns de euros e que  reforzará os servizos de rehabilitación e ampliará o cribado neonatal.

Unha Estratexia que se enmarca na aposta do Goberno autonómico por tratar desde a sanidade pública as enfermidades raras e mellorar a calidade de vida dos máis de 5.200 pacientes diagnosticados que hai na comunidade con algunha destas patoloxías.

Ao respecto, a Xunta creou nos últimos anos unidades específicas para enfermidades raras na Coruña, Santiago de Compostela e Vigo, que xa rexistraron 5.600 consultas. Ademais, Galicia conta co cribado neonatal máis completo de España.

No marco desta iniciativa, a Xunta realizará un investimento que superará os 396 millóns de euros para desenvolver un conxunto de actuacións que teñen por obxectivo mellorar a calidade de vida destes pacientes que sofren este tipo de doenzas, durante os próximos cinco anos.