Santiago de Compostela, 22 de xullo de 2025

A Xunta, por medio da Consellería de Sanidade, publicou no Portal de Contratos Públicos, a licitación, por un importe de 84.700 euros, do subministro de sete equipos de potenciais evocados automatizados para o Programa Galego para a detección precoz da xordeira en período neonatal.

As empresas interesadas nesta licitación, enmarcada no Plan de Recuperación, Transformación e Resiliencia financiado pola Unión Europea, teñen de prazo ata o vindeiro 6 de agosto para presentar as súas ofertas.

O obxectivo deste investimento é mellorar o diagnóstico e a asistencia sanitaria ás enfermidades raras. Unha das áreas clave da actuación sanitaria da Consellería de Sanidade é precisamente a prevención e o diagnóstico precoz das enfermidades conxénitas. Unha das enfermidades conxénitas nas que é posible o diagnóstico neonatal de maior incidencia é a hipoacusia neurosensorial polo que, desde o ano 2002, se está a realizar un programa que permita o diagnóstico temperán e o tratamento precoz desta enfermidade coa finalidade de mellorar o desenvolvemento cognitivo, emocional e social dos nenos afectados.

O Programa galego para a detección da xordeira en período neonatal conseguiu detectar de xeito precoz 418 casos desde a súa posta en marcha no ano 2002. Desde entón lévanse realizadas máis de 372.000 probas.

A tal efecto, realízase unha proba de cribado auditivo a todos os neonatos antes da súa saída do hospital. Para realizar o cribado é necesario contar con equipos potenciais evocados automatizados. Nestes momentos, todos os hospitais dispoñen deles, pero hai nalgúns centros que é necesario renovalos.

Estratexia galega enfermidades raras

O Executivo galego aprobou recentemente a Estratexia Galega en Enfermidades Raras 2025-2030, que reforzará os servizos de rehabilitación e ampliará o cribado neonatal.

Unha Estratexia enmárcase na aposta do Goberno autonómico por tratar desde a sanidade pública as enfermidades raras e mellorar a calidade de vida dos máis de 5.200 pacientes diagnosticados que hai na comunidade con algunha destas patoloxías.

No marco desta iniciativa, a Xunta realizará un investimento que superará os 396 millóns de euros para desenvolver un conxunto de actuacións que teñen por obxectivo mellorar a calidade de vida destes pacientes que sofren este tipo de doenzas, durante os próximos cinco anos.